ԵՐԵՎԱՆ, 20 մարտի – Sputnik. Մարտի 20-ին Wizz Air ավիաընկերությունն իրականացրել է Վիեննա-Երևան-Վիեննա ուղղությամբ առաջին չվերթը։ Տեղեկությունը հայտնում է ՀՀ քաղավիացիայի կոմիտեի լրատվական ծառայությունը։
«Տեղեկացնում ենք, որ Վիեննայից Երևան են ժամանել 14 ՀՀ քաղաքացի, իսկ Երևանից Վիեննա մեկնել Ավստրիայի 8 քաղաքացի»,- նշված է կոմիտեի տարածած հաղորդագրության մեջ։
Նշենք, որ կորոնավիրուսի տարածումը կանխարգելելու և արտակարգ դրության պատճառով Հայաստանը ժամանակավորապես արգելել է Չինաստանի, Իրանի, Հարավային Կորեայի, Ճապոնիայի, Իտալիայի, Իսպանիայի, Ֆրանսիայի, Գերմանիայի, Շվեյցարիայի, Դանիայի, Ավստրիայի, Բելգիայի, Նորվեգիայի, Շվեդիայի, Նիդեռլանդների և Մեծ Բրիտանիայի քաղաքացիների մուտքը Հայաստան: ՀՀ քաղաքացիներին, սակայն, թույլատրվում է հիշյալ քաղաքներից վերադառնալ հայրենիք։ Ժամանումից անմիջապես հետո նրանք անցնելու են 14-օրյա կարանտինային ռեժիմի։
