ԵՐԵՎԱՆ, 20 մարտի - Sputnik. ՀՀ ԱԺ-ն արտահերթ նիստ է գումարել, որի օրակարգում մեկ հարց կա: Այս մասին նիստի մեկնարկից հետո հայտնեց ԱԺ նախագահ Արարատ Միրզոյանը:
Նա նշեց, որ նիստը գումարվել է կառավարության առաջարկով՝ ՀՀ քրեական և վարչական իրավախախտումների մասին օրենսգրքերում փոփոխություններ կատարելու օրինագիծը հրատապ՝ 24-ժամյա ռեժիմում ընդունելու համար:
Արդարդատության փոխնախարար Վահե Դանիելյանը հայտնեց, որ նախագծերը մշակվել են ՝ հիմք ընդունելով այն հանգամանքը, որ ՀՀ-ում կորոնավիրուսով պայմանավորված մարդկանց իրավունքները սահմանափակվում են, բայց այդ սահմանափակումներին չենթարկվելու համար ՀՀ օրենսդրությամբ սահմանված չեն իրավական հետևանքներ:
«Հետևաբար, այս լրացումներով ապահովվելու է արտակարգ դրության իրավական ռեժիմով սահմանված կարգը: Բանն այն է, որ ներկայում անձինք մեկուսացվում կամ ինքնամեկուսացվում են՝ հիմք ընդունելով այն հանգամանքը, որ համաճարակի կանխման համար դրա անհրաժեշտությունը կա, սակայն ոչ բոլոր անձինք են հոժարակամ մեկուսացվում»,- ասաց նա:
Էական փոփոխությունները դեռ առջևում են. ՊԵԿ նախագահը՝ արտակարգ դրության վտանգների մասին
Կառավարությունն ԱԺ-ին առաջարկել է օրինագծերը քննարկել 24-ժամյա ռեժիմով, բայց ԱԺ Կանոնակարգ օրենքը դա թույլ չի տալիս․ ԱԺ արտահերթ նիստը պետք է ավարտվի ոչ ուշ քան 23:00-ին:
«Հետևաբար, մենք ո՛չ այսօր կարող ենք ավարտել, ո՛չ վաղը կարող ենք անել, քանի որ ԱԺ Կանոնակարգ օրենքը թույլ չի տալիս շաբաթ օրը նիստ գումարել: Մնում է նիստ գումարել երկուշաբթի օրը: Դրա համար առաջարկում եմ՝ այսօր քննարկենք, իսկ երկուշաբթի կազմակերպենք երկրորդ ընթերցումը»,- ընդգծեց Արարատ Միրզոյանը՝ հավելելով, որ հակառակ դեպքում փակուղում կհայտնվեն:
ԱԺ պատգամավորների մարտ ամսվա պարգևավճարները կուղղվեն ՀՀ-ում կորոնավիրուսի դեմ պայքարին
Ի վերջո խորհրդարանը քննարկմամբ հաստատեց ԱԺ նախագահի առաջարկը: Նիստը մեկնարկեց, որը կընթանա մինչև 23:00։ Քննարկումները կշարունակվեն մարտի 23-ին՝ ժամը 11:00-ից սկսած:
