ԵՐԵՎԱՆ, 19 մարտի - Sputnik. Որոշում է ընդունվել ժամանակավորապես սահմանափակել մի շարք բժշկական արտադրատեսակների արտահանումը Հայաստանի Հանրապետությունից:
«Նշված արտադրատեսակների արտահանումը կարող է թույլատրվել Պետական եկամուտների կոմիտեի կողմից՝ հիմք ընդունելով Առողջապահության նախարարության գրավոր համաձայնությունը»,- Facebook-ի իր էջում գրել է ՀՀ փոխվարչապետ, արտակարգ դրության պարետ Տիգրան Ավինյանը։
Պարետի որոշման համաձայն՝ տվյալ արտադրատեսակների արտահանումը ժամանակավորապես սահմանափակվում է նաև ՀՀ-ից դեպի ԵԱՏՄ երկրներ։
Բժշկական արտադրատեսակների ցանկում են շնչառական, նաև բժշկական տարատեսակ դիմակներ, պաշտպանիչ ակնոցներ, քիմիական պաշտպանության մեկանգամյա օգտագործման արտահագուստ, առանձնահատուկ ամրության բախիլներ, վիրակապեր, բամբակ, թանզիֆ, բժշկական տարատեսակ ձեռնոցներ, շնչառական սարքավորում, Էթիլային սպիրտ, ախտորոշիչ թեստեր և այլն։
Արտահանումը սահմանափակող որոշումը տարածվում է և; այն արտահանումների վրա, որոնք մինչև որոշման ուժի մեջ մտնելը մաքսային ձևակերպման փուլում են, և; փաստացի արտահանման ենթակա ապրանքների վրա:
Հիշեցնենք, որ վերջին տվյալներով՝ Հայաստանում գրանցվել է կորոնավիրուսով վարակվելու 122 դեպք։
Վարակման առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։
Կորոնավիրուսով հիվանդներին բուժելու համար Հայաստանում կլինեն առանձին հիվանդանոցներ
Հայաստանում մարտի 16–ից ապրիլի 14-ը արտակարգ դրություն է հայտարարվել։ Պարետ է նշանակվել փոխվարչապետ Տիգրան Ավինյանը։Պարետատան կազմում են կառավարության անդամներն ու ենթակա մարմինների ղեկավարները։
Տղամարդիկ 2.5 անգամ ավելի շատ են մահանում կորոնավիրուսից, քան կանայք. Թորոսյան
