ԵՐԵՎԱՆ, 18 մարտի –Sputnik. ՀՀ փոխվարչապետ, պարետ Տիգրան Ավինյանը Facebook-ի իր էջում գրել է, որ այսօր պարետատան նիստին մանրամասն քննարկվել են մի շարք կարևոր հարցեր։Մասնավորապես՝ քայլեր են ձեռնարկվում հանրային տրանսպորտի երթուղիներում շահագործվող տրանսպորտային միջոցների, ավտոկայանների և Երևանի մետրոպոլիտենի ախտահանման աշխատանքները կազմակերպելու ուղղությամբ:
«Անդրադարձ է կատարվել փակ տարածություններում գործող խոշոր առևտրային օբյեկտներում կանխարգելիչ գործողություններին: Ընդգծվել է, որ այդ օբյեկտների աշխատակիցները պետք է ապահովվեն բժշկական դիմակներով և ախտահանիչ նյութերով, տարածքները պարբերաբար ախտահանվեն և սանիտարական անհրաժեշտ պայմանները պահպանվեն, ինչպես նաև բացառվեն մարդկանց կուտակումները»,-գրել է փոխվարչապետը:
Նրա խոսքով՝ ցուցումների կատարման վերահսկողությունը մարզերում դրվել է մարզպետների, իսկ Երևանում՝ քաղաքապետի վրա:
Ավինյանը կոչ է արել հնարավորինս խրախուսել արտակարգ դրության ժամանակ բնակչությանը էլեկտրոնային կառավարման գործիքների միջոցով ծառայությունների մատուցումը և ապահովել դրանց մասին իրազեկվածությունը:
Գործատուներին կպարտադրեն ապահովել աշխատողների ու հաճախորդների անվտանգությունը
Հիշեցնենք, որ մարտի 18–ի դրությամբ Հայաստանում կորոնավիրուսով վարակվելու 102 դեպք է արձանագրվել։
Վարակման առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Հայաստանում մարտի 16–ից արտակարգ դրություն է հայտարարվել։
Ոստիկանությունը հորդորում է սահմանված քանակից ավել ուղևորներ չտեղափոխել. տեսանյութ
