ԵՐԵՎԱՆ, 18 մարտի — Sputnik. Դերասանուհի Լուիզա Ներսիսյանը, որն այս օրերին Ֆրանսիայում էր, Երևան վերադառնալուց հետո օդանավակայանում պարտադիր ստուգման ժամանակ ջերմություն է ունեցել, ինչի հետևանքով նրան տեղափոխել են «Նորք» ինֆեկցիոն հիվանդանոց։
Ինչպես չընկնել սթրեսի մեջ և չգիրանալ. պայքարին միացել են սննդաբաններն ու մարզիչները
Տեղեկությունը դերասանուհին հայտնել է Instagram-ի իր էջի «սթորի» բաժնում։ Ներսիսյանը կորոնավիրուսի թեստ է հանձնել և ողջ գիշերն անցկացրել հիվանդանոցում։ Առավոտյան պարզվել է, որ թեստի արդյունքը բացասական է։ Դերասանուհին այժմ ինքնամեկուսացած է։
Նշենք, որ Հայաստանում կորոնավիրուսով վարակվելու դեպքերը մարտի 18–ի դրությամբ 102–ն են:
Վարակման առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Հայաստանում մարտի 16–ից արտակարգ դրություն է հայտարարվել։
