ԵՐԵՎԱՆ, 17 մարտի – Sputnik. ՀՀ վարչապետ Նիկոլ Փաշինյանը շրջայց է կատարում Երևանի սուպերմարկետներում։ Նա մտավ սուպերմարկետ և զրույց ունեցավ աշխատակցի հետ։ Աշխատակիցը վարչապետին ասաց, որ որևէ մթերքի և ապրանքի հետ կապված դեֆիցիտ չունեն, իսկ գնումների առումով մարդիկ երեկ էին ավելի շատ առևտուր անում, այսօր` սովորականի նման։
Որոշ ավիաընկերություններ դադարեցնում են իրենց թռիչքները
Փաշինյանն ուղիղ եթերով ցույց տվեց խանութների լի դարակները` նշելով, որ ոչ մի ապրանքի բաժին դատարկ չէ։
«Հայաստանում բազմաթիվ մարդիկ, հավանաբար, հիվանդանում և առողջանում են` իրենք էլ այդ մասին տեղյակ չլինելով»,–ներկայացնելով վիճակագրությունը ճանապարհին ասաց Փաշինյանը։
Հետո նա մտավ միրգ–բանջարեղենի խանութ։ Վաճառողը հավաստիացրեց, որ գնումներն այսօր հանդարտ են եղել, բայց երեկ շատ են առևտուր արել։ Նա նկատեց, որ խանութում բոլոր տեսակի միրգ–բանջարեղեններն առկա են։
Վարչապետը երեկվա աշխույժ առևտուրը բացատրեց նրանով, որ երեկ արտակարգ դրություն հայտարարելով, իրենք չեն նշել, որ պարետային ժամ չի լինելու, և մարդիկ կարող են հանգիստ ներս ու դուրս անել և գնումներ կատարել։
«Մեր ռազմավարությունն առաջին հերթին պիտի լինի մեր վերաբերմունքի փոփոխությունը կորոնավիրուսի վերաբերյալ»,–ասաց վարչապետը` նշելով, որ H1N1-ից էլ էին մարդիկ մահանում։
Մտնելով դեղատուն` վարչապետը ճշտեց` ինչ չունեն։ Պարզվեց դեղատանը չկա ալկոգել, դիմակ և սպիրտ, ինչն էլ շատ անհրաժեշտ է այս օրերին։ Լուրը տխրեցրեց Փաշինյանին։
Նշենք, որ Հայաստանում վարակված անձանց ընդհանուր թիվը մարտի 17–ի դրությամբ 72-ն է, մեկն արդեն առողջացել է։
Հայաստանում կորոնավիրուսի առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Պաշտպանության նախարարությունում դադարեցվում է թղթային տարբերակով որևէ գրության ընդունումը
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակակիրների թիվը սկսեց աճել։
Մարտի 16-ին ՀՀ վարչապետ Նիկոլ Փաշինյանը հայտնեց, որ կորոնավիրուսի դեպք է արձանագրվել նաև Երևանի արտադրական ձեռնարկություններից մեկում։
Հայաստանում երեկվանից արտակարգ դրություն է հայտարարվել։
