ԵՐԵՎԱՆ, 16 մարտի – Sputnik. «5–րդ ալիքի» սեփականատեր Արմեն Թավադյանն այսօր Sputnik Արմենիա մամուլի կենտրոնում կայացած ասուլիսում հայտարարեց, որ իր մեղադրանքն ու կալանքն անօրինական էին ու ընդդիմադիր լրատվամիջոցներին ճնշելու նպատակ էին հետապնդում։ Նա չբացառեց, որ ապագայում ևս իր նկատմամբ «գործեր կարելու» փորձեր կլինեն։
«Նախապես ասեմ՝ այդ ամենն անօգուտ է։ Ես երբեք չեմ խառնվել հեռուստաընկերության գործերին։ Այնտեղ պրոֆեսիոնալներ են աշխատում։ Մեր նպատակը օբյեկտիվ լրատվություն տարածելն է։ Որևէ այլ խնդիր մենք չունենք»,- ասաց Թավադյանը։
Իսկ իր նկատմամբ քրեական հետապնդումը նա ավելի շատ պայմանավորում է ՀՀ երկրորդ նախագահ Ռոբերտ Քոչարյանի հետ ունեցած իր մտերմությամբ։
Թավադյանի փաստաբան Հովհաննես Խուդոյանն էլ ընդգծեց` ի սկզբանե ակնհայտ էր, որ մեղադրանքի, առավել ևս՝ կալանավորման հիմքեր չկան։ Ոստիկանության հրապարակած տեսանյութն էլ, նրա խոսքով, մոնտաժված էր։ Փաստաբանը հայտնեց, որ քրեական գործի նյութերն արդեն փոխանցվել են իրենց, և դատախազությունն առաջիկայում գործը կուղարկի դատարան։ Խուդոյանը հույս հայտնեց, որ գործն, այնուամենայնիվ, կկարճվի, քանի որ այն իր բնույթով «աբսուրդային» է։
Թավադյանի գույքի վրա դատարանի որոշմամբ կիրառված կալանքը նույնպես, փաստաբանի համոզմամբ, անօրինական է։ Նախաքննական մարմինը դրա անհրաժեշտությունը մեկնաբանում է դատական ծախսերով, թեև կալանքի առնված գույքը մի քանի անգամ գերազանցում է նշված ծախսերի համար անհրաժեշտ ֆինանսական միջոցները։
TV5-ի լրատվական բաժնի ղեկավար Հարություն Հարությունյանն էլ կարծիք հայտնեց, որ սեփականատիրոջ գույքի նկատմամբ կալանք կիրառելը հեռուստաընկերությանը ֆինանսապես խեղդելու նպատակ է հետապնդում։
Նրա խոսքով` լրատվամիջոցն արդեն դժվար օրեր է ապրում։ Անգամ քննարկվել է հեռուստաալիքը կամավոր հանգանակություններով պահելու հարցը։ Բանն այն է, որ, Հարությունյանի խոսքով, սեփականատիրոջ կալանավորումը որոշ անհանգստություն էր առաջացրել նաև գովազդատուների շրջանում։
«Ազդեցիկ գովազդատուներ ունեինք, որոնք արդեն 3 ամիս դադարեցրել են մի շարք խոշոր նախագծերի ֆինանսավորումը»,- հայտնեց Հարությունյանը։
Հիշեցնենք, որ դեկտեմբերի 24–ին «5-րդ ալիք» հեռուստաընկերության սեփականատեր Արմեն Թավադյանին կալանավորել էին կազմակերպված խմբի կողմից վկային կամ տուժողին սուտ ցուցմունք տալու նպատակով կաշառելու կասկածանքով: Նրան կալանավորել էին դեկտեմբերի 26–ին։ Իսկ մարտի 11-ին նա ազատ էր արձակվել։
Ըստ ՀՔԾ–ի`Արմեն Թավադյանը, Վարուժան Մկրտչյանը և կազմակերպված խմբի այլ անդամներ 2019 թվականի սեպտեմբերին Թավադյանի աշխատասենյակ են հրավիրել Ռոբերտ Քոչարյանի և մյուսների վերաբերյալ քրեական գործով տուժողին, առաջարկել 5 միլիոն ՀՀ դրամ կաշառք՝ տված ցուցմունքներից հրաժարվելու և Ռոբերտ Քոչարյանի օգտին սուտ ցուցմունք տալու համար։ Այս փաստերի հիման վրա Արմեն Թավադյանին և Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով: Գործի նախաքննությունն ավարտվել է։ Այն դատարան ուղարկելու համար տրվել է մեղադրյալներին ու նրանց պաշտպաններին` գործի նյութերին ծանոթանալու համար։
