ԵՐԵՎԱՆ, 16 մարտի - Sputnik. ՀՀ Կառավարությունն այսօր 1-2 ժամից խորհրդակցություն կանցկացնի արտակարգ դրություն հայտարարելու հարցով։
Տեղեկությունն այսօր առավոտյան Facebook-ի ուղիղ եթերում հայտնեց վարչապետ Նիկոլ Փաշինյանը։
«Կարևոր որոշումներ պիտի կայացնենք՝ քննարկելով առկա իրավիճակը։ Պիտի մասնավորապես պատասխանենք հարցին, թե արդյո՞ք կարիք կա Հայաստանում կամ հանրապետության առանձին հատվածներում կորոնավիրուսի հետ կապված արտակարգ դրություն հայտարարել»,- ասաց վարչապետը։
Այդուհանդերձ, Փաշինյանը խոստացավ, որ եթե անգամ արտակարգ դրություն հայտարարվի, ՀՀ քաղաքացիների կյանքը շատ բանով չի փոխվի։ Միայն համաճարակային առավել ռիսկային տարածքներում ավելի խիստ հսկողություն կսահմանվի, ինչպիսի երեկ երեկոյից սահմանվել է Էջմիածին քաղաքի մուտքերի մոտ։
Հայկական հումորը սահմաններ չունի, կամ ծիծաղում ենք անգամ կորոնավիրուսի վրա
Փաշինյանը հայտնեց նաև, որ երեկ գիշերը ստացվել է իր կորոնավիրուսի 2-րդ թեստի պատասխանը։ Այն բացասական է եղել։ Ուստի վարչապետն այսօր կվերադառնա Սևանից Երևան ու աշխատանքը կշարունակի կառավարության շենքում։
Հիշեցնենք` Հայաստանում արդեն կորոնավիրուսով վարակվելու 30 հաստատված դեպք կա։
