ԵՐԵՎԱՆ, 16 մարտի - Sputnik. Փետրվարի 20-ից մինչև մարտի 15-ը Իրանից ՀՀ են ժամանել 3509 ՀՀ քաղաքացի։ Այս մասին Ազգային ժողովում արտակարգ դրություն մտցնելու հարցը քննարկելու ժամանակ ասաց վարչապետ Նիկոլ Փաշինյանը` պատասխանելով պատգավորների հարցին։
«Իրանից Հայաստան եկած ՀՀ քաղաքացիներն անցել են ջերմաչափում և այլն։ Եթե մենք բոլոր եկածներին մեկուսացնեինք, ապա մեզ պետք կլիներ 10-ը «Գոլդեն փելես»։ Ընդ որում` 3509 քաղաքացիներից միայն 3–ն են, որ կորոնավիրուսով վարակված են»,–ասաց Փաշինյանը։
Նրա խոսքով` եթե բոլորին մեկուսացնեին, մեկուսացման ծավալները սպառած կլինեին։ Բացի այդ, ըստ նրա, դրանից հետո Իտալիայից 813 ՀՀ քաղաքացի են եկել` նրանց որտե՞ղ պետք է մեկուսացնեին։
Արտակարգ դրության ընթացքում վարչապետը չի բացառում հարկադրանքի միջոցների կիրառումը
Բոլոր դրսից եկածներին մեկուսացնելը, ըստ վարչապետի, բացարձակապես անարդյունավետ քաղաքականություն կլիներ։
Պատասխանելով հարցին, թե Հայաստանում քանի շնչառական սարք կա, քանի որ վարակի դեպքում երբեմն պետք են լինելու այդ սարքերը` Փաշինյանը պատասխանեց, որ 360 շնչառական սարք կա։ Նրա խոսքով`այս պահին «Նորք» ինֆեկցիոն ԲԿ–ում 15 նման սարք կա, սակայն ևս 11–ը այս պահին գնում են, իսկ գնման գործընթացը շարունակական բնույթ է կրում։
Հիշեցնենք, որ այս պահի դրությամբ Հայաստանում կորոնավիրուսով վարակման 30 դեպք է գրանցվել։ Մեկուսացված է շուրջ 380 քաղաքացի։
