ԵՐԵՎԱՆ, 15 մարտի-Sputnik. Ամենայն Հայոց Հայրապետը հետևում է կորոնավիրուսի տարածման առնչությամբ բոլոր զարգացումներին թե´ հայրենիքում, թե´ արտերկրի թեմերում ու համայնքներում։ Մայր Աթոռի Տեղեկատվական համակարգի տնօրեն Վահրամ քահանա Մելիքյանը պաշտոնական հաղորդագրություն է տարածել՝ անդրադառնալով Հայոց Եկեղեցու կողմից ձեռնարկված քայլերին ու միջոցառումներին կորոնավիրուսի վարակի տարածումը կանխելու համար։
«Ամենայն Հայոց Կաթողիկոսի հայրական հորդորն է ամենքիս պահպանել խաղաղություն, հոգատարություն և սեր դրսևորել միմյանց հանդեպ, որ զորացնենք մեզանում միաբանության ոգին՝ ի վիճակի լինելու միասնական ջանքերով հաղթահարել այս համավարակը»,- նշված է հաղորդագրության մեջ:
Տեր Վահրամը հիշեցրել է, որ Մայր Աթոռում Ամենայն Հայոց Կաթողիկոսի նախագահությամբ դեռ մարտի 13-ին գումարված ժողովը հանդես է եկել հայտարարությամբ՝ կոչ անելով հանդես բերել առավելագույն զգոնություն ու պատասխանատվություն, հետևողականությամբ ու ամենայն լրջությամբ պահպանել մասնագիտացված կառույցների կողմից սահմանված պահանջներն ու ցուցումները և իրականացնել համավարակի կանխարգելման բոլոր միջոցառումները:
Նրա խոսքով՝ թեմակալ առաջնորդների միջոցով հոգևոր հովիվներին տրված են եղել անհրաժեշտ հանձնարարություններ՝ մասնավորապես կիրակնօրյա պատարագի ժամանակ եկեղեցիներում կանխարգելիչ միջոցների ձեռնարկման առնչությամբ։
Կորոնավիրուսով վարակված երեխայի ուսուցիչները, դասընկերները մեկուսացված են. մանրամասներ
Պատարագի ընթացքում հոգևորականներն իրենց աղոթքն են բարձրացրել առ Աստված մեր հայրենիքի, ժողովրդի առողջ և անվտանգ կյանքի համար և հորդորել պատասխանատվությամբ մոտենալ պատկան մարմինների կողմից տրվող ցուցումներին։
ԿԳՄՍ-ն մի շարք որոշումներ է ընդունել. Արայիկ Հարությունյանը մանրամասներ է ներկայացրել
Տեր Վահրամը տեղեկացրել է, որ Մայր Աթոռ Սուրբ Էջմիածնում ևս դադարեցված է մի շարք կառույցների` ներառյալ կրթական, սոցիալական խնամատարական հաստատությունների, Մայր Աթոռի թանգարանների գործունեությունը: Իսկ վաղը Մայր Աթոռում Վեհափառի նախագահությամբ ժողով է գումարվելու, որի ընթացքում կքննարկվեն իրավիճակին առնչվող մի շարք կարևոր հարցեր։
