ԵՐԵՎԱՆ, 15 մարտի-Sputnik. ՀՀ վարչապետ Նիկոլ Փաշինյանը Facebook-ի ուղիղ եթերը սկսեց լավ լուրով՝ կորոնավիրուսով վարակված առաջին պացիենտն արդեն դուրս է գրվում հիվանդանոցից։ Նա 14 օր շարունակ, հիվանդանոցում գտնվելով, ոչ մի դեղ չի ընդունել, բուժում չի ստացել, ինքնաբուժվել է և այսօր տուն է գնում։
Հայաստանը ծափահարում է կորոնավիրուսի դեմ պայքարող բուժաշխատողներին. տեսանյութ
Դրան հաջորդեց վատ լուրը՝ կորոնավիրուսով վարակվածների թիվն արդեն 28 է. արձանագրված դեպքերից 18-ը փոխկապակված են «Էջմիածնի» դեպքի հետ։
«Այսօր 23:00-ից պետք է խնդրենք Էջմիածնի մեր բնակիչներին քաղաքի 27 ելքերից օգտվել միայն 3-ից։ Մենք տեղում կջերմաչափենք Էջմիածնի մեր բոլոր բնակիչներին, և նրանց, ովքեր ջերմություն կունենան, կխնդրենք ինքնամեկուսացում իրականացնել»,- ասաց վարչապետն ու նշեց, որ բաց կլինեն Վաղարշապատ-Երևան, Վաղարշապատ-Աշտարակ և Վաղարշապատ-Մասիս ճանապարհները, կգործեն բուժկետ և ոստիկանական կետ, կիրականացվեն քաղաքացիների ջերմաչափումներ։
Վարչապետի խոսքով՝ ներկա իրավիճակում հաճախ զուգահեռներ են անցկացվում H1N1 վիրուսի հետ, որի բռնկում Հայաստանում երկու անգամ է եղել՝ 2009 և 2016 թվականներին։ Նրա խոսքով՝ 2016թ.-ին մենք ունեցել ենք 30 մահ, իսկ 2009 թվականին մահվան դեպքերի վիճակագրություն չի իրականացվել, բայց մասնագետների խոսքով՝ մոտ 50 մահ է գրանցվել։ Նման խառնաշփոթ այդ տարիներին չի եղել, ինչը վարչապետը տրամաբանական է համարում. այդ տարիներին ինֆորմացիոն տեխնոլոգիաներն այսքան զարգացած չէին, համացանցի նման հասանելիություն, նաև խոսքի նման ազատություն չկար։
Նա անդրադարձավ նաև հնչող այն քննադատություններին, որ Իրանից և Իտալիայից ժամանած բոլոր քաղաքացիներին հենց սկզբից պետք էր մեկուսացնել։ «Այսօր մենք կարող ենք արձանագրել, որ Իտալիայից և Իրանից Հայաստան եկած հարյուրավոր քաղաքացիներից ունեցել ենք հինգ-վեց վարակվածության դեպք։ Մեր որոշումը եղել է, որ պետք է ըստ բժշկական ցուցման իրականացնենք մեկուսացումը, ոչ թե ըստ ժամանման երկրի։ Եթե մենք այն ժամանակ սկսեինք այդ համատարած մեկուսացումը, եթե մենք այդ քաղաքականությունը վարեինք, վաղը Իտալիայից եկող 150 քաղաքացիներին մեկուսացնելու տեղ չէինք ունենա և նրանց պետք է ինքնամեկուսացման առաջարկ անեինք»,- ասաց վարչապետը։
Հայաստան կբերվեն կորոնավիրուսի ախտորոշման «արագ թեստեր». Տիգրան Ավինյան
Նրա կարծիքով՝ ավելի վատ համաճարակային իրավիճակում մեր մեկուսացման հնարավորություններն ավելի պակաս կլինեին։ Փաշինյանը նաև անդրադարձավ այն հանգամանքին, որ իրենց ընտանիքը շարունակում է Սևանում մնալ։ Նրա խոսքով՝ առաջին անգամ իրենց ընտանիքի մեկուսացման առիթը Բրազիլիայից եկող լուրերն էին։ Վարչապետի տիկին Աննա Հակոբյանը հանդիպումներ էր ունեցել Բրազիլիայի առաջին տիկնոջ հետ, իսկ Բրազիլիայի նախագահի մոտ կորոնավիրուս էր կասկածվում։
Վարչապետի ընտանիքը կորոնավիրուսի ախտորոշման թեստ էր հանձնել, որի արդյունքները երեկ բացասական էին եղել։ Իսկ այսօր պարզվեց, որ Մեղրիում հայտնաբերված, կորոնավիրուսով վարակված անձի հետ առնչություն է ունեցել հենց վարչապետը։ Մասնավորապես, Մեղրիից Երևան գալու ճանապարհին նա շփում է ունեցել այդ քաղաքացու հետ ճանապարհի բիստրոներից մեկում։ Քիչ առաջ Փաշինյանի ընտանիքը կորոնավիրուսի ախտորոշման թեստ է հանձնել։
«Եթե պատասխանը կլինի դրական, մենք կինքնամեկուսանանք Սևանում, եթե ոչ, կվերադառնանք Երևան, կաշխատեմ կառավարության շենքում»,- ասաց Փաշինյանը։
Հիշեցնենք, որ կորոնավիրուսով վարակվելու 3 դեպք հաստատվել էր այսօր առավոտյան։ Նրանց մեջ նաև Էջմիածնի դպրոցներից մեկում սովորող երեխա կա։ Վարակվածներից 21-ի առողջական վիճակը բավարար է, այդ թվում` նաև դպրոցահասակ երեխայինը: Մյուս 2 պացիենտի մոտ առկա է թոքաբորբ, բայց նրանց կյանքին վտանգ չի սպառնում։
Ժամը 20։00–ի սահմանում պարզ դարձավ, որ ևս 3 մարդու թեստերը դրական են եղել։ Իսկ քիչ առաջ նրանց ավելացան ևս 2–ը։ Այսպիսով, միայն մարտի 15–ին կորոնավիրուսով վարակման 8 դեպք է գրանցվել Հայաստանում, ընդհանուր թիվը հասել է 28-ի։ Մոտ 300 քաղաքացի գտնվում են կարանտինում։
Հայաստան կբերվեն կորոնավիրուսի ախտորոշման «արագ թեստեր». Տիգրան Ավինյան
Առնվազն մինչև մարտի 23-ը ՀՀ-ում չեն գործի կրթական հաստատությունները։ ՀՀ ԿԳՄՍ նախարար Արայիկ Հարությունյանի հանձնարարությամբ` հատուկ առցանց հարթակներ են ստեղծվում հեռավար ուսուցում կազմակերպելու համար։ Չեն գործի նաև թատրոնները, համերգասրահները, առևտրի խոշոր կենտրոնները, մի շարք մարզասրահներ։
