ԵՐԵՎԱՆ, 14 մարտի - Sputnik. ԱՄՆ նախագահ Դոնալդ Թրամփը կորոնավիրուսի թեստ է հանձնել, որի պատասխանը կլինի մի քանի օրից։ Տեղեկությունը հայտնում է Sputnik International–ը։
Նախագահի բժիշկն այսօր հաստատել էր, որ նախորդ շաբաթ բրազիլական պատվիրակության հետ հանդիպման ժամանակ Թրամփը շփում է ունեցել մի մարդու հետ, որի մոտ երեք օր անց կորոնավիրուսի ախտանշաններ են ի հայտ եկել։ Բացի այդ, ուրբաթ երեկոյան հայտնի էր դարձել, որ Թրամփի հետ այդ երեկո նույն սեղանի շուրջ նստած մարդկանցից մեկի մոտ նույնպես կորոնավիրուս է ախտորոշվել։
Թեև Թրամփն ու նրա բժիշկը հայտարարել էին, որ նախագահը կորոնավիրուսի թեստ հանձնելու կարիք չունի, այդուհանդերձ Սպիտակ տան ղեկավարը որոշել է ստուգվել։
«Ես երեկ երեկոյան (ուրբաթ) թեստ եմ հանձնել։ Այն ուղարկվել է լաբորատորիա», - այսօր Սպիտակ տանը կայացած ասուլիսի ժամանակ ասել է Թրամփը։
Արդյունքները մի քանի օրից պատրաստ կլինեն։ Հարցին, թե որքան է նրա ջերմությունը, նախագահը պատասխանել է․ «Լրիվ նորմալ»։
Ինչ վերաբերում է կորոնավիրուսի հետ կապված իրավիճակին՝ Թրամփն ասել է, որ ԱՄՆ–ում 50 մարդ է մահացել, այդ թիվը կարող էր ավելի մեծ լինել, եթե միջոցներ չձեռնարկվեին։
