ԵՐԵՎԱՆ, 13 մարտի — Sputnik. Առնվազն մինչև մարտի 23-ը կրթական հաստատությունների աշխատանքը կդադարեցվի։ Facebook սոցցանցի իր էջում ուղիղ եթերում այս հայտարարությունն արեց ՀՀ վարչապետ Նիկոլ Փաշինյանը` ամփոփելով կառավարությունում կորոնավիրուսի հետ կապված ընթացիկ իրավիճակը գնահատելու համար հրավիրված խորհրդակցության արդյունքները։
«Մարտի 18-19–ին ևս կանդրադառնանք այս թեմային և, եթե անհրաժեշտություն լինի, կրկին կերկարացնենք այդ ժամկետը»,–ասաց Փաշինյանը։
Նրա խոսքով` այսօր սպասում են լավ նորությունների կորոնավիրուսի հետ կապված. հետազոտվելու են «Գոլդեն փելեսում» մարտի 1-ից կարանտինի մեջ գտնվողները, և բավական մեծ է հավանականությունը, որ բացասական կլինեն թեստի արդյունքները։ Նրանց, վարչապետի հավաստմամբ, տուն կճանապարհեն։
Մեծ քանակով հիվանդների դեպքում ծանր կլինի և ԱՀԿ–ի օգնության կարիքը կունենանք. «Հրապարակ»
Վարչապետն ասաց` այս պահին դրությամբ կորոնավիրուսով վարակվելու նոր դեպքեր չկան։ Նա միաժամանակ կոչ արեց, որ մարդիկ անհատական պատասխանատվություն վերցնեն իրենց վրա։
Վարչապետը խորհուրդ տվեց դրսում մեկը մյուսին հանդիպելիս չհամբուրվել ու սովորույթը փոխել. ոչ մի ողբերգություն դրանից տեղի չի ունենա։
«Պետք է խուճապի չմատնվենք, քանի որ կորոնավիրուսի ձախորդ օրերը ձմռան նման կուգան ու կերթան։ Վստահեք միայն պետական մարմինների հաղորդած լուրերին»,–ասաց Փաշինյանը։
