ԵՐԵՎԱՆ, 12 մարտի — Sputnik. ՀՀ վարչապետ Նիկոլ Փաշինյանն այսօր Ջերմուկում սահմանադրական փոփոխությունների հանրաքվեի «Այո»–ի քարոզարշավի ժամանակ հայտարարեց, որ երեկվանից հանրությունը քննադատում է կառավարությանը, քանի որ վերաքննիչ դատարանը կալանքից ազատել է Ռոբերտ Քոչարյանի ամենահայտնի կողմնակիցներից մեկին։ Փաշինյանն անուն չնշեց, բայց նրա ասածը վերաբերում էր «5-րդ ալիք» հեռուստաընկերության սեփականատեր Արմեն Թավադյանին, որը երեկ ազատ արձակվեց դատավոր Ալեքսանդր Ազարյանի որոշմամբ։
«Էդ որոշումից հետո կառավարությանը սկսեցին քննադատել` բա կառավարությունը կո՞ւյր է, չի՞ տեսնում, որ գործն էն դատավորի մոտ է, որը հրապարակային պաշտպանել է Ռոբերտ Քոչարյանին և նրա թիմին։ Բայց որոշումը կայացրել է դատարանը։ Հարցը հենց դա է` մեզ պետք է այնպիսի դատական համակարգ, որը եթե ինչ–որ մեկին ազատ արձակի, մենք ասենք` լավ, ուրեմն հիմքեր ունի ազատելու։ Ես չեմ ասում, որ երեկ դատարանը հիմքեր չի ունեցել ազատելու, բայց մեր առաջին ռեակցիան այն է, թե էս ի՞նչ դավադրություն է», – նշեց Փաշինյանը։
Փաշինյանի խոսքով` Սահմանադրական հանրաքվեի նպատակը ոչ թե այն է, որ դատական համակարգը ենթարկվի հետհեղափոխական կառավարությանը, այլ բացարձակ անկախ լինի և քաղաքականությունից դուրս։
«Ո՞նց կարող է դատավորը Քոչարյանի, Փաշինյանի կամ Պողոսյանի աջակից լինի։ Քաղաքական որևէ կողմի աջակիցը կարող է ամեն ինչ լինել, բացի դատավորից։ Ոնց որ էն կինոյի մեջ է ասում՝ մուզիկանտ չզբաղվել պոլիտիկա, հիմա էլ մենք ենք ասում` Հրայր Թովմասյան չզբաղվել պոլիտիկա։ Եթե ուզում է զբաղվի պոլիտիկա, թող ազատի Սահմանադրական դատարանի նախագահի աշխատասենյակը, թող գա, Ջերմուկում ձեր առջև կանգնի, ինչքան ուզում է քաղաքականությամբ զբաղվի»,- ասաց Փաշինյանը։
Հիշեցնենք, Փաշինյանը մարտի 10-ից արձակուրդ է վերցրել` Հայաստանի տարբեր մարզերում քարոզարշավ իրականացնելու համար։ Նա արդեն եղել է Սյունիքում, այժմ Վայոց Ձորում է։ Սահմանադրական փոփոխությունների հանրաքվեն կկայանա ապրիլի 5–ին։ Քարոզարշավը մեկնարկել է մարտի 2-ին և կտևի մինչև ապրիլի 3-ը։
«Կարո՞ղ եմ ասել` այսօր ոչ մի պաշտոնյա կաշառք չի վերցնում». Փաշինյանը խոսեց բացթողումներից
