ԵՐԵՎԱՆ, 12 մարտի — Sputnik. Վաղարշապատի Խ. Աբովյանի անվան թիվ 4 հիմնական դպրոցի տնօրենը տուն է ուղարկել բուժքրոջը, որը մասնակցել է նույն նշանադրության արարողությանը, որին ներկա է եղել նաև կորոնավիրուսով վարակված անձը։ Տեղեկությունը հայտնում է Pastinfօ–ն` հղում անելով դպրոցի տնօրեն Արուսյակ Մուրադյանին։
Նա պատմել է, որ բուժքույր Արևիկ Հովհաննիսյանն առավոտյան եկել է աշխատանքի և դպրոցի մուտքի մոտ տնօրենին ասել՝ իրեն արգելված է դպրոց մտնել, 10 օր պետք է խուսափի շփումներից։
«Պատմեց, որ կիրակի օրը եղել է նշանադրության արարողությանը։ Ինձ տեղեկացրեց այդ մասին և տուն գնաց, որից հետո դպրոցի մուտքի մոտ ստացել ենք համապատասխան ախտահանիչ նյութերը։ Ինչպես ամեն օր, այնպես էլ այսօր նախքան դասասենյակ մտնելը, բոլոր աշակերտները և ուսուցիչներն ախտահանվել են»,-ասել է տնօրենը։
Դպրոցի տնօրենը նաև հայտնել է, որ բուժքույրն աշակերտների հետ շփումներ ունեցել է. «Չկա մի օր, որ, օրինակ, երեխաները ջերմություն չունենան, բուժքրոջ սենյակ չգնան։ Աշխատակիցների և երեխաների հետ շփում, իհարկե, եղել է»,-ասել է Մուրադյանը։
Կայքը նաև հայտնում է, որ աշակերտների ծնողները, լսելով կորոնավիրուսի վերաբերյալ լուրերը, օրվա ընթացքում տուն են տարել իրենց երեխաներին։
Բայց քանի որ դասերը դադարեցնելու հրահանգ չունեն, դպրոցը կշարունակի աշխատել։
Աշխարհում կորոնավիրուսով վարակվածների թիվը գերազանցել է 126 հազարը
Հիշեցնենք` երեկ` մարտի 11-ին, ՀՀ վարչապետ Նիկոլ Փաշինյանը հայտարարեց, որ Հայաստանում կորոնավիրուսի երեք նոր դեպք է բացահայտվել։ Երկուսը ՀՀ քաղաքացի են (45 և 27 տարեկան), մեկը՝ Իտալիայի (51 տարեկան), նա աշխատում է Հայաստանում։ Երեքն էլ ժամանել են Իտալիայից: Այսօր հայտնի դարձավ, որ նրանցից մեկը Էջմիածնի բնակիչ մի կին է, որը 10 օր առաջ է Հայաստան ժամանել և հասցրել է մասնակցել հուղարկավորության և նշադրեքի արարողությունների։
Կորոնավիրուսով վարակվածների հետ շփվածներից 10-ին մեկուսացրել են «Գոլդեն փելեսում»։
Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ է: Նա Իրանից Հայաստան է ժամանել փետրվարի 28-ին: Ավելի ուշ հայտնի դարձավ, որ 31 հոգու մեկուսացրել են Ծաղկաձորի «Գոլդեն փելես» հյուրանոցում։ Նրանք բոլորը կորոնավիրուսով վարակված տղամարդու հետ ինքնաթիռում շփված քաղաքացիներ են:
Կորոնավիրուսով վարակվածներից մեկի հետ շուրջ 50 մարդ է շփվել, 6 ընտանիք է մեկուսացվել
