Քրեական ոստիկանության գլխավոր վարչության կոռուպցիոն և տնտեսական հանցագործությունների դեմ պայքարի վարչությունում տեղեկություններ են ստացվել, որ թիվ 12 պոլիկլինիկայի նորանշանակ տնօրենն աշխատակիցներից մեկից պահանջել է, որ նա այցելուներից, այսպես ասած, որպես «թեյավճար» գումար հավաքագրի և ամեն ամիս որպես կաշառք 50 հազար դրամ տա իրեն՝ սպառնալով և ակնարկելով, որ հակառակ դեպքում կազատի աշխատանքից։
Ըստ ոստիկանության` պարզվել է, որ հիշյալ աշխատակիցը հրաժարվել է տնօրենի ապօրինի պահանջը կատարելուց և փետրվարի 21-ին ազատվել աշխատանքից։ Տեղեկությունների հիման վրա նախապատրաստված նյութերով փաստական տվյալներ են ձեռք բերվել, որ տնօրենը նույն եղանակով կաշառք է պահանջել նաև պոլիկլինիկայի մեկ այլ աշխատակցից։
Պոլիկլինիկայի տնօրենը բերման է ենթարկվել ու ձերբակալվել։
Դեպքի առնչությամբ գլխավոր վարչության կոռուպցիոն և տնտեսական հանցագործությունների դեմ պայքարի վարչությունում քրեական գործ է հարուցվել, որն ուղարկվել է քննչական կոմիտե։
Զորակոչիկի մորից կաշառք է վերցրել ծառայությունը հետաձգելու համար. բժշկին կալանավորել են
Հիշեցնենք, որ նշված պոլիկլինիկան գտնվում է Ավան վարչական շրջանում։ Պոլիկլինիկայի նախկին տնօրեն Արմեն Վարդումյանն աշխատանքից ազատվել էր այս տարվա փետրվարի 18-ին։ Ըստ Երևանի քաղաքապետարանի կայքում հրապարակված տեղեկության` նրանից հետո տնօրեն է նշանակվել Արա Ներսիսյանը։
