ԵՐԵՎԱՆ, 9 մարտի — Sputnik. ՀՀ ԱԺ նախկին պատգամավոր, ՀՀԿ անդամ Միհրան Հակոբյանը Fаcebook-ի իր էջում գրել է, որ ՀՀ քննչական կոմիտե է հրավիրվել ԱԺ–ի իր համակարգչի կորստի պատճառով։
«Ինչպես տեղեկացրել էի` այսօր հրավիրված էի Արաբկիրի քննչական բաժին` քրեական գործով որպես վկա հարցաքննության: Պարզվեց` գործը կապված է Ազգային ժողովում գույք կորչելու հետ, որն ինձ առնչվում է այնքանով, որքանով որ ԱԺ-ում իմ նախկին աշխատասենյակի համակարգիչը չկա: Որոնողական աշխատանքների արդյունքում որոշվել է, որ ես պետք է հարցաքննվեմ և պատասխանեմ հարցին` արդյո՞ք տեղյակ եմ, թե որտեղ է իմ նախկին աշխատասենյակի համակարգիչը»,– գրում է նախկին պատգամավորը:
Նա նաև հայտնում է, որ ԱԺ-ի իր աշխատասենյակը հանձնել է 2018թ.-ի դեկտեմբերին` համապատասխան փաստաթղթերով: Նրա խոսքով` ԱԺ աշխատակցի ներկայությամբ կազմվել է ընդունման– հանձնման ակտը, որով ինքը շենքից դուրս է բերել իր անձնական իրերը:
«Հիմա պարզվում է` ԱԺ միջանցքների տեսախցիկների նկարածը չի պահպանվել, և ԱԺ-ում չեն կարողանում գտնել համակարգիչը, որը աշխատասենյակի հետ միասին հանձնել եմ ԱԺ աշխատակազմին: Բնական հարց է չէ՞ առաջանում. ինչպե՞ս կարող էր 2019թ-ի ընթացքում համակարգիչը մոնիտորով ու քեյսով ԱԺ շենքի տարածքից անէանալ, երբ շենքը ԱԱԾ կողմից հատուկ պահպանվող պետական օբյեկտ է, ԱԱԾ-ն էլ վարչապետին ենթակա կառույց է: Ինչևէ, Արաբկիրի քննչական բաժնում այսօր հարց են տվել` համակարգիչը չկա, կարո՞ղ է տեղյակ լինեք` որտե՞ղ է այդ համակարգիչը: Պատասխանել եմ, որ համակարգիչը փաստաթղթավորված հանձնել եմ, իսկ հիմա պատկերացում չունեմ, թե որտեղ կարող է լինել այդ համակարգիչը»,– գրում է Միհրան Հակոբյանը։
ԱԺ նախկին պատգամավորի տունը թալանել են
Նախկին պատգամավորը հայտնում է նաև, որ կորած համակարգիչը նոր չէր, այլ «դարն ապրած» և ԱԺ-ում էր հայտնվել հնության պատճառով պետական մեկ այլ հաստատության հաշվեկշռից դուրս գրվելու հետևանքով:
Նշենք, որ մինչ այդ Միհրան Հակոբյանը Facebook-ում հայտնել էր, որ Քննչական կոմիտեից հարցաքննության ներակայանալու ծանուցագիր է ստացել: Հրապարակված ծանուցագրից պարզ է դառնում, որ այն գրված է 2020թ.–ի փետրվարի 20-ին։
Միհրան Պողոսյանը, սակայն, հայնել էր, որ այն ստացել է ուշացումով։
