ԵՐԵՎԱՆ, 6 մարտի — Sputnik. Իսրայելում հայ հոգևորականի վրա թքած քաղաքացին կտուգանվի։ Տեղեկությունը Facebook-ի իր էջում հրապարակել է Երուսաղեմի սուրբ Աթոռի դիվանապետ Հովնան Բաղդասարյանը։
«Ուրախությամբ տեղեկացնում ենք, որ 1967 թվականից ի վեր առաջին անգամ հայ հոգևորականի վրա թքելու համար Իսրայելի ոստիկանությունը որոշել է տուգանել օրինախախտ քաղաքացու»,–գրել է նա:
Բաղդասարյանը տեղեկացրել է, որ դեպքը տեղի էր ունեցել մեկ տարի առաջ: Երուսաղեմի Հին քաղաքի Հայկական թաղամասում հրեա երիտասարդը, տեսնելով հայ հոգևորականների եկեղեցական թափորը, մի քանի անգամ թքել էր հոգևորականներից մեկի վրա:
Երիտասարդն անմիջապես հանձնվել էր թափորն ուղեկցող ոստիկաններին, տուժող հոգևորականը բողոք էր ներկայացրել ոստիկանություն:
Առանց նյարդայնացնող մուղամի. Հին Երուսաղեմում հայկական ժողովրդական երգեր են հնչում
Տեր Հովնանը տեղեկացրել էր, որ հարցաքննությունից և ականատեսների վկայություններից հետո ոստիկանությունը մարտի 5-ին պաշտոնական նամակով ծանուցել է տուժած հոգևորականին, որ ոստիկանությունը որոշել է օրինախախտ երիտասարդին տուգանել 1500 շեքելով (430 դոլար):
