ԵՐԵՎԱՆ, 5 փետրվարի – Sputnik. Այսօր, գիշերը ժամը 02.40-ի սահմաններում, ոստիկանության հարյուրավոր աշխատակիցների կողմից տեղի է ունեցել հարձակում Արամ Վարդանյանին (Վստրեչի ապեր) և նրա հարազատներին պատկանող, Արցախի փողոցի 17 հասցեում գտնվող տների վրա։ Տեղեկությունը հայտնում է փաստաբան Երվանդ Վարոսյանը։
«Ոստիկանության հարյուրավոր աշխատակիցներ շրջափակել են նշված հասցեում գտնվող բազմաթիվ տները, ապօրինի, առանց թույլտվության, ոչինչ չբացատրելով, որևէ փաստաթուղթ չներկայացնելով, կոտրելով դռներն ու պատուհանները, հատուկ սարքերի միջոցով կտրելով ճաղավանդակները, ներխուժել են նշված տները, որի ընթացքում նաև կատարել հափշտակություն։ Անգամ տանը մանկահասակ երեխայի առկայությունը չի կանգնեցրել ոստիկաններին շարունակել զենքի օգտագործմամբ ապօրինությունները, որի հետևանքով երեխայի առողջությանը պատճառվել է լուրջ վնաս»,– Facebook–ի իր էջում գրել է Վարոսյանը։
Նա նշել է, որ այս թեմայով այսօր ասուլիս են անցկացնելու նույն հասցեում՝ Արցախի փողոց թիվ 17/8։
Ոստիկանությունից Sputnik Արմենիային հայտնեցին, որ գործություններն անցկացվել են կոնկրետ քրեական գործի շրջանակում` չնշելով, թե ինչ քրգործի մասին է խոսքը։
Հիշեցնենք, որ Արամ Վարդանյանը` «Վստրեչի ապերը», հայտնի քրեական հեղինակություն է։
«Չփորձեք ինձ ներքաշել քաղաքական խաղերի մեջ». «Վստրեչի ապերը» հայտարարություն է տարածել
