Նարեկ Մինասյանը համոզված է, որ թեև վերջին շրջանում Իդլիբի շուրջ Ռուսաստանի և Թուրքիայի միջև լարվածություն է առաջացել, բայցևայնպես դա դեռևս բավարար հիմք չէ ենթադրելու, թե Թուրքիան կփորձի օգտագործել ադրբեջանական գործոնն ընդդեմ Ռուսաստանի։
Ըստ քաղաքագետի` եթե լարվածությունը խորանա և մտնի անմիջական բախումների փուլ, ապա միայն այդ դեպքում Թուրքիան տեսականորեն կարող է դրդել Ադրբեջանին, որպեսզի նա ակտիվացնի ղարաբաղյան խաղաքարտը` փորձելով որոշակի անկայունություն մտցնել հարավկովկասյան տարածաշրջանում։
«Բայց նման քայլից առաջ ադրբեջանական կողմը, բնականաբար, պետք է մի քանի անգամ լավ հաշվարկի, թե ինչ հետևանքներ դա կարող է ունենալ իր համար, որովհետև ոչ մի կերպ չեն կարող նախևառաջ կանխատեսել, թե ինչ արձագանք կտան Արցախի և Հայաստանի զինված ուժերը»,– նշում է քաղաքագետը։
Մինասյանի կարծիքով` ադրբեջանական կողմը որևէ նախաձեռնություն ցուցաբերելուց կամ սադրանքի գնալուց առաջ պետք է հաշվի առնի նաև Ռուսաստանի հնարավոր արձագանքը։ Արդյո՞ք Մոսկվան հնարավոր սրացումը չի դիտարկի որպես իր շահերի դեմ անուղղակիորեն ուղղված քայլ, ինչը, բնականաբար, կունենա որոշակի հետևանքներ Բաքվի համար։
Քաղաքագետի գնահատմամբ` արցախյան ճակատում էսկալացիան ձեռնտու չէ նաև Մինսկի խմբի մյուս համանախագահող երկրներին` ԱՄՆ–ին և Ֆրանսիային, որովհետև չի բխում նրանց շահերից։ Թեև Ռուսաստանը արցախյան հակամարտությունում կայունության գլխավոր շահառուն է, բայց ԱՄՆ–ն և Ֆրանսիան նույնպես չեն կարող գոհ մնալ Ադրբեջանի հնարավոր սադրանքից։ Նարեկ Մինասյանի համոզմամբ` Մերձավոր Արևելքում առհասարակ Թուրքիայի դերակատարության մեծացումը չի բխում տարածաշրջանային որևէ տերության շահերից, որովհետև փորձը ցույց է տալիս, որ Էրդողանն աստիճանաբար դառնում է անկանխատեսելի ու անվերահսկելի։
Հիշեցնենք, որ իրավիճակն Իդլիբում սրվել էր փետրվարի 27–ին, երբ «Հայաթ Թահրիր աշ–Շամ» խմբավորման (Ռուսաստանում և այլ երկրներում արգելված ահաբեկչական կազմակերպություն) ահաբեկիչները լայնամասշտաբ հարձակում էին սկսել սիրիական բանակի դիրքերի վրա։ Կառավարական զորքերը պատասխան կրակ էին բացել, զոհվել էր 36 թուրք զինվորական, որոնք չպետք է այնտեղ գտնվեին, ևս 30-ը վիրավորվել էր։ Ի պատասխան թուրքական զորքերը հարված էին հասցրել սիրիական բանակին։
Թուրքիայի նախագահ Ռեջեփ Թայիփ Էրդողանը ծրագրում է ստեղծված իրավիճակը քննարկելու համար մարտի 5-ին այցելել Ռուսաստան։
Թուրքիան բացել է Եվրոպայի հետ սահմանը սիրիացի փախստականների համար
