ԵՐԵՎԱՆ, 27 փետրվարի – Sputnik. Երևան-Մեղրի միջպետական մայրուղու Վայոց Ձորի հատվածում այսօր երեկոյից իրանական պետհամարանիշներով տասնյակ բեռնատարներ են կուտակված: Aysor.am-ի թղթակիցը ֆիքսել է՝ ինչպես են բժշկական դիմակներով ոստիկանները ստուգում վարորդներին:
«Ըստ էության, սա պրոֆիլակտիկ զննություն է, որը պայմանավորված է Իրանում կորոնավիրուսի տարածման հետ»,– գրում է կայքը:
ՀՀ առողջապահության նախարար Արսեն Թորոսյանն ավելի վաղ հայտնել էր, որ Մեղրիի անցակետից Հայաստանի տարածք մուտք գործած իրանական բոլոր բեռնատարները ՀՀ տարածքում տեղաշարժվում են հայաստանցի մասնագետների և ոստիկանության ուղեկցությամբ։ Նա նշել էր նաև, որ Իրանի քաղաքացի վարորդների նկատմամբ սահմանվում է հսկողություն Հայաստանի ողջ տարածքում, այդ թվում` ՊԵԿ մաքսային պահեստներում, մինչև նրանց վերադառնալը։
Այսօրվա տվյալներով` Իրանում կորոնավիրուսով վարակվածների թիվն արդեն հասել է 245-ի, մահացածների թիվը` 26–ի։ Ըստ օրվա ցուցանիշների` վարակման ամենաշատ դեպքերը գրանցվել են Թեհրանում` 38 դեպք։ Հաջորդը Գիլան նահանգն է` 23 դեպք, հետո Ղոմը, որտեղից էլ սկսվել էր կորոնավիրուսի տարածումը։
Նշենք, որ ըստ վերջին տվյալների` այսօր Իրանում վարակվածների թվի ամենակտրուկ աճն է գրանցվել` ավելի քան 100 մարդ։
Հիշեցնենք, որ փետրվարի 26-ի տվյալներով` Իրանում գրանցվել էր վարակման 139 և մահվան 19 դեպք:
Իրանի իշխանությունը որոշել է մինչև մարտի 6–ը չեղարկել մշակութային միջոցառումները։ Ուսումնական հաստատությունները ևս անորոշ ժամանակով փակ կլինեն։
Իրանում կորոնավիրուսի տարածման պատճառով Հայաստանի կառավարությունը փետրվարի 24-ից երկու շաբաթով փակել է հարևան երկրի հետ ցամաքային սահմանը։ Մասնակի սահմանափակվել են նաև ՀՀ–ից դեպի Իրան օդային փոխադրումները։ Սակայն Հայաստան ժամանակ Իրանի բոլոր քաղաքացիները կարող են տուն վերադառնալ, Իրանում գտնվող ՀՀ քաղաքացիներն էլ կարող են առանց սահմանափակումների Հայաստան վերադառնալ։
Իրանից Հայաստան, այնուհետև Վրաստան. կարո՞ղ է արդյոք կորոնավիրուսը «գալ» բեռնատարով
