ԵՐԵՎԱՆ, 26 փետրվարի— Sputnik. ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը Sputnik Արմենիայի հետ զրույցում ասաց, որ իր գլխավորած հանձնաժողովը կուսումնասիրի` կոնյակն իսկական է, թե ոչ։
Հայաստանի Պետական եկամուտների կոմիտեի տեղեկությունների համաձայն`«թավշյա հեղափոխությունից» առաջ ներմուծված կոնյակի սպիրտը կոնյակի արտադրության 40%-ն է կազմել։ 2018 թվականի մայիսից հետո ներկրումը շարունակվում է, բայց ավելի փոքր ծավալով (արտադրության 5-6%–ը)։ Sputnik Արմենիան արդեն անդրադարձել է այդ հարցին։ Օրենսդրության համաձայն` հայկական կոնյակի արտադրության մեջ արգելվում է ներմուծված սպիրտ օգտագործել։
Դեղ, թե կոնյակ` կեղծիքն անթույլատրելի է. Ռուսաստանում և Հայաստանում պայքար են սկսել
Գևորգյանը նշեց, որ շուկան ներկրած սպիրտից մաքրելու գործընթացը հետագայում էլ է շարունակվել։ 2018 թվականին 1 միլիոն տոննա կոնյակի սպիրտ է Հայաստան բերվել, իսկ 2019 թվականին` 2 միլիոն։ Սա մոտավորապես տասն անգամ ավելի քիչ է, քան նախկինում։
«Այնուամենայնիվ, կան սուբյեկտներ, որոնց կոնյակի արժեքը ցածր է հաշվարկված ինքնարժեքից»,–ասաց հանձնաժողովի նախագահը։
Կոպիտ հաշվարկով` մեկ լիտր գինու համար 1,3 – 1,4 կիլոգրամ խաղող է հարկավոր, իսկ մեկ լիտր կոնյակի համար 7-8 գինենյութ է պետք (երբեմն` ավելի շատ)։ Եթե հիմա կոնյակի խաղողի մեկ կիլոգրամը գնում են 120-130 դրամով, ապա խաղողի արժեքը կոնյակում 1 100 դրամ է լինում։ Սրան ավելանում են շիշն ու հնեցումը։
«Այդ պատճառով, երբ 1500 դրամով կոնյակ եմ տեսնում, ինձ համար դա շատ տարօրինակ է։ Կարծում եմ` ոչ միայն ինձ համար», – ավելացրեց Գևորգյանը։
Կոնյակը կհամեմատվի մթերվող խաղողի հետ. ՏՄՊՊՀ–ն անբարեխղճություն է նկատում
Որ այդպիսի «կոնյակ» այլևս չլինի, պետք է հասկանալ` ով ինչքան խաղող է գնում։ Տրամաբանությունը պարզ է` եթե մեկ տոննա (պայմանականորեն) խաղող եք գնում ու երեք հազար լիտր կոնյակ վաճառում, ուրեմն այդքան էլ ազնիվ չեք խաղում։
Գործող կանոնների համաձայն` կոնյակի գործարանները պետք է գրանցումների մատյան վարեն ու գրեն` որ գյուղացուց որքան խաղող են գնել։ Բայց երբ Պետական հանձնաժողովը փորձել է ստանալ այդ մատյանների տվյալները, պարզվել է, որ միայն մեկ–երկու գործարան ունեն դա։
Հիմա պետական հանձնաժողովն ուզում է առաջարկել մեխանիզմներ, որոնցով այդ կանոնները պետք է աշխատեն։
Իհարկե, այդ մատյաններում կարելի է կեղծ գրառումներ անել, բայց Էկոնոմիկայի նախարարությունը, մարզպետարաններն ու տեղական իշխանությունը միշտ կարող է ստուգել դրանց հավաստիությունը, ասենք` արդյո՞ք Պողոս Պողոսյանը գոյություն ունի, արդյո՞ք նա խաղողի այգի ունի, ու արդյո՞ք նա ոռոգման ջուր է օգտագործում (եթե ոչ, ուրեմն այգին չի մշակվում)։
«Այս ամենը կարելի է ստուգել, եթե կա քաղաքական կամք։ Իսկ ներկայիս իշխանությունն ունի այդ կամքը»,–ասաց Գևորգյանը։
Բացի այդ, հանձնաժողովը կառաջարկի գույքագրել կոնյակի գործարաններում առկա կոնյակի պաշարները, որ իմանա` ինչ ծավալ է պահվում յուրաքանչյուր գործարանի պահոցներում։ Դրանից հետո հին տակառներին արդեն պետք կլինի նորը գումարել։
Նշենք` վերջին տարիներին Հայաստանը մոտ 200 միլիոն դոլարի կոնյակ է արտահանում։ Հիմնական սպառման շուկան մնում է Ռուսաստանը։
Մեր կոնյակն ու գինին կարող են գրավել վիետնամական շուկան. Սուան Ֆուքն ընդունել է Փաշինյանին
