ԵՐԵՎԱՆ, 25 փետրվարի — Sputnik, Կարինե Հարությունյան. Իրանից Հայաստան վերադառնալու ցանկություն է հայտնել ՀՀ 65 քաղաքացի, այդ թվում` երկքաղաքացիներ: Sputnik Արմենիայի հետ զրույցում տեղեկությունը հայտնեց ՀՀ արտաքին գործերի նախարարի մամուլի խոսնակ Աննա Նաղդալյանը։
Իրանում ՀՀ դեսպանությունը, հաշվի առնելով երկրում կորոնավիրուսի հետ կապված իրավիճակը և վարակի հնարավոր տարածման վտանգը, հորդորել էր ԻԻՀ տարածքում գտնվող հայաստանցիներին կապ հաստատել դեսպանության հետ և տեղեկություն տրամադրել գտնվելու վայրի վերաբերյալ:
«Իրանից Հայաստան վերադառնալու ցանկություն է հայտնել ՀՀ 65 քաղաքացի` արձագանքելով ԻԻՀ-ում ՀՀ դեսպանության հայտարարություններին։ Փետրվարի 26-ին նախատեսվում է չվերթ՝ ՀՀ քաղաքացիներին հայրենիք վերադարձնելու համար»,–ասաց Նաղդալյանը։
Sputnik Արմենիան կապ հաստատեց նաև Իրանում ՀՀ դեսպանության հետ, որտեղից հայտնեցին, որ կապ են պահպանում ՀՀ բոլոր քաղաքացիների հետ։
Դեսպանությունից ասացին` այս պահին Իրանում իրավիճակն այնպիսին չէ, որ ՀՀ քաղաքացիների տարհանում իրականացվի, և Հայաստան կվերադառնան միայն նրանք, ովքեր նման ցանկություն կհայտնեն։
«Հայաստան վերադառնալու ցանկություն հայտնած 65 քաղաքացների գերակշիռ մասը երկքաղաքացի է։ «Արմենիա էյրվեյսը» շաբաթական երկու թռիչք կիրականացնի Հայաստան–Իրան–Հայաստան ուղղությամբ։ Մենք աջակցում ենք Հայաստան վերադառնալ ցանկացողներին ինչով կարողանում ենք»,–ասաց Իրանում ՀՀ դեսպանության աշխատակիցը։
Դեսպանության համար բոլոր քաղաքացիների շարժը վերահսկելի է, և անգամ այն քաղաքացիները, որոնք կմոռանան հայտնել, որ ՀՀ են տեղափոխվում, դեսպանության` սահմանին ստուգումներ իրականացնող աշխատակիցները կինֆորմացվեն այդ մասին։
Ինչ վերաբերում է Իրանում գտնվող հայերի տրամադրվածությանը, ապա դեսպանությունը վստահեցնում է` հայերի մոտ խուճապ չկա, նրանք բավականին հանգիստ են։ Նրանք ապահովության համար են ուզում Հայաստան վերադառնալ, քանի որ կորոնավիրուսով վարակվածների ու հիվանդությունից մահվան դեպքերի թիվն ավելանում է։
Հիշեցնենք, որ Իրանում փետրվարի 25-ի, ժամը 13:00-ի դրությամբ արձանագրվել է կորոնավիրուսսով վարակման 61 դեպք, որից 15-ը՝ մահվան ելքով:
Կորոնավիրուսի բռնկում. ինչ վիճակ է Հայաստանում և ինչ է արվում դրա դեմ պայքարի ուղղությամբ
Հայաստանում նոր կորոնավիրուսի դեմ պայքարի աշխատանքները շարունակվում են և փետրվարի 25-ի, ժամը 13:00-ի դրությամբ մեր երկրում նշված վարակի հաստատված դեպք չկա:
