ԵՐԵՎԱՆ, 24 փետրվարի — Sputnik. Վերջին օրերին Առողջապահության համաշխարհային կազմակերպության փորձագետը Հայաստանում էր` գնահատելու, թե կորոնավիրուսի համաճարակի բռնկմանը որքանո՞վ են պատրաստ հայաստանյան բուժհաստատությունները։ Լրագրողների հետ զրույցում այս մասին հայտնեց ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը։
«Եթե ՀՀ-ում կորոնավիրուսի դեպքեր հայտնաբերվեն, ապա մենք լիարժեք պատրաստ ենք որոշակի քայլեր իրականացնելուն։ Մեր ԲԿ–ների կարողությունները գնահատված են, և առողջապահության նախարարը բոլոր բացերը լրացնելու ցուցում է տվել։ Բացերը հիմնականում վերաբերում են այն հարցերին, որ, օրինակ, եթե բռնկում լինի, ԲԿ–ներն ունե՞ն դիմակներ, խալաթներ»,–ասաց Վանյանը` հավելելով, որ որոշ ԲԿ–ներում նաև այդ հարցերով կան բացեր։
Նրա խոսքով` այսօրվանից հասցեական քարտեր կներդնեն ու լիարժեք հսկողություն կիրականացնեն ռիսկային երկրներից` Իտալիայից, Կորեայից և այլ տեղերից ՀՀ վերադարձողների նկատմամբ։
Անդրադառնալով դիմակների բացակայությանը` մասնագետը պատասխանեց, որ, ճիշտ է` դեղատներում դիմակների պակաս կա, սակայն քայլեր են ձեռնարկվում լրացուցիչ քանակի դիմակներ ձեռքբերելու համար։
Հայաստանը բոլոր միջոցները ձեռնարկում է կորոնավիրուսի դեմ պայքարելու համար. փորձագետ
Վանյանը հայտնեց` այս ընթացքում կորոնավիրուսի կասկածանքով 83 անձ են հոսպիտալացրել, բոլորը թեստավորվել են. արդյունքները բացասական են եղել։
«Մենք այժմ կորոնավիրուսի ախտորոշման 600-700 թեստ ունենք, ավելին, առաջիկայում 1000 թեստ էլ կստանանք` այդ առումով որևէ խնդիր չկա»,–նշեց Վանյանը։
Հիշեցնենք, որ այսօր որոշվել է երկու շաբաթով փակել Իրանի հետ ցամաքային սահմանը: Օդային հաղորդակցության նկատմամբ կկիրառվեն ոչ ամբողջական սահմանափակումներ: Իրանի Իսլամական Հանրապետության հետ բեռնափոխադրումները իրականացվելու են առանց սահմանափակումների` վարորդների նկատմամբ հատուկ հսկողության ռեժիմ կիրառելով: Որևէ սահմանափակում չի կիրառվի Հայաստանի Հանրապետության և Իրանի Իսլամական Հանրապետության քաղաքացիների հայրենիք վերադառնալու համար:
Զոհրաբ Մնացականյանը խոսել է կորոնավիրուսի մասին
Չինաստանում, փետրվարի 24-ի դրությամբ, COVID-2019 կորոնավիրուսի զոհերի թիվը հասել է 2592-ի, վերջին մեկ օրում մահացել է 150 վարակակիր:
Ամբողջ երկրում գրանցվել է վարակի 77,1 հազար դեպք, իսկ 24,7 հազար վարակակիրներ ապաքինվել են։
