Իրանագետ Արմեն Իսրայելյանի դիտարկմամբ` Իրանում ընտրությունների ելքը նախապես կանխորոշված էր, և արդյունքներն առանձնապես անակնկալ չէին Իրանի հասարակության ու քաղաքական ուժերի համար։
Իսլամական հեղափոխության պահապանները փրկում են Սիրիայի քրիստոնյաներին. իրանահայ պատգամավոր
«Մինչև ընտրությունների մեկնարկն արդեն պատկերը պարզ էր, այսինքն Սահմանադրության պահապանների խորհրդի կողմից երբ հաստատվեց պահպանողական ու բարեփոխական թեկնածուների ցանկը, վերջիններիս թվաքանակը զգալիորեն նվազել էր, հետևաբար, կասկած չկար, որ պահպանողականները Մեջլիսում ունենալու էին լուրջ ներկայություն»,– նշում է իրանագետը։
Իսրայելյանի փոխանցմամբ` ներկա ընտրությունները նախորդի համեմատ անցան ոչ այնքան ակտիվ. 2016թ.–ին ձևավորված Մեջլիսի հետ հասարակությունը կապում էր ավելի մեծ հույսեր, քանի որ նոր էր ստորագրվել միջուկային համաձայնագիրը, իսկ հիմա այն ձախողվել է, դրան գումարվել են սոցիալ–տնտեսական խնդիրներն ու արտաքին մարտահրավերները։
Թեհրանական հորիզոններ. Երևանը գազ կգնի՞ Իրանից
Անդրադառնալով Իրանի Մեջլիս անցած երկու հայ պատգամավորներին` իրանագետը նշեց, որ Արա Շահվերդյանն ու Ռոբերտ Բեգլարյանն ունեն վստահության բարձր քվե։
Ընդ որում, Ռոբերտ Բեգլարյանը եղել է նաև նախորդ գումարման պատգամավոր, մինչդեռ Արա Շահվերդյանը նոր գործիչ է, և նրան աջակցել է պայքարի կեսից դուրս եկած` Մեջլիսի նախորդ գումարման պատգամավոր Կարեն Խանլարյանը։
«Մեջլիսի իրանահայ պատգամավորները հիմնականում հանդես են գալիս հայ համայնքին հուզող հարցերով, որոնք առնչվում են սոցիալ–տնտեսական, կրթական և մշակութային խնդիրներին, իսկ համահայկական համատեքստում նրանց գործունեությունն ավելի շատ վերաբերում է ցեղասպանության ճանաչման ու դատապարտման գործընթացին։ Նրանք քննում են նաև հայ–իրանական հարաբերություններին առնչվող հարցեր»,– ասում է իրանագետը։
Արմեն Իսրայելյանը հայ պատգամավորների գործունեությանը հիմնականում հետևել է իրանահայ մամուլում զետեղված նյութերի միջոցով և նշում է այն հանգամանքը, որ նրանք իրոք վայելում են տեղի հայկական համայնքի հարգանքն ու վստահությունը։
Իրանը վախենում է Ռուսաստանի չեզոքությունից. ո՞րն է Հայաստանի կարևոր դերն այս ամենում
