ԵՐԵՎԱՆ, 20 փետրվարի — Sputnik. ՀՀ առողջապահության նախարարությունը տեղեկացնում է` Երևանի հիվանդանոցները սուր շնչառական վարակներով պայմանավորված դեռևս գերծանրաբեռնված են աշխատում. բուժում ստացողների 91.7%-ը մինչև 18 տարեկան երեխաներ են:
«Դպրոցներում իրականացվում է «համաճարակաբանական ֆիլտր», որի արդյունքում սուր շնչառական վարակներին բնորոշ ախտանշաններով երեխաների մուտքն արգելվում է դպրոց: Այսօր 351 երեխայի չի թույլատրվել մասնակցել դասապրոցեսներին, մասնավորապես՝ Երևանում տուն է ուղարկվել 142, իսկ մարզերում՝ 209 երեխա»,– նշված է հաղորդագրության մեջ։
Սակայն դրական ընթացք է դիտվում կրթական հաստատություններում` շնչառական վարակներով պայմանավորված բացակայությունների մասով. եթե փետրվարի 17-ին բացակայությունները կազմում էին 7,1%, ապա այսօր` 4.4% է:
Լաբորատոր հետազոտությունների արդյունքների համաձայն` հանրապետությունում շարունակվում է գրիպի Ա H1N1 ենթատեսակի (դիտվում է նահանջ), եզակի դեպքերում՝ Ա H3N2 ենթատեսակի, գրիպի Բ տեսակի, ինչպես նաև շնչառական այլ վարակների հարուցիչների շրջանառությունը:
Քայլեր են ձեռնարկվում կորոնավիրուսի ներթափանցումը Հայաստան թույլ չտալու համար
Ի դեպ, այսօր ամբուլատոր պոլիկլինիկական կազմակերպություններ դիմելիությունը նախորդ օրվա համեմատ գտնվում է միևնույն մակարդակի վրա, իսկ շտապ օգնության կանչերը՝ այս հիվանդությունների առումով նվազել են:
Հիշեցնենք, որ Արցախի բնակչության շրջանում սուր շնչառական վարակի սեզոնային աճի գրանցման և համաճարակաբանական լարված իրավիճակի հետ կապված՝ դադարեցվել են հանրակրթական և նախադպրոցական ուսումնական հաստատությունների պարապմունքները։
