ԵՐԵՎԱՆ, 20 փետրվարի — Sputnik. Գեղարքունիքի մարզպետ Գնել Սանոսյանն ուրախ է, որ այլևս չի աշխատելու կադաստրի կոմիտեի նախկին ղեկավար Սարհատ Պետրոսյանի և քաղաքաշինության պետական կոմիտեի նախագահ Վահագն Վերմիշյանի հետ: Լրագրողների հետ զրույցում նման կարծիք հայտնեց նա այսօր՝ ամփոփելով նախորդ տարվա արված աշխատանքները:
Նշենք, որ 2019-ի հոկտեմբերի 18-ին Կադաստրի կոմիտեի ղեկավար Սարհատ Պետրոսյանը հրաժարականի դիմում էր ներկայացրել վարչապետ Նիկոլ Փաշինյանին։ Սարհատ Պետրոսյանը Կադաստրի կոմիտեի ղեկավար էր նշանակվել 2018 թվականի օգոստոսի 8-ին։
Ինչ վերաբերում է քաղշինի ղեկավար Վահագն Վերմիշյանին, ապա փետրվարի 5-ին ՀՀ ազգային անվտանգության ծառայությունը հայտնեց, որ Վերմիշյանը ձերբակալվել է. նա մեղադրվում է կաշառք ստանալու մեջ: Վերմիշյանը Քաղաքաշինության կոմիտեի նախագահ է նշանակվել 2019 թվականի մարտի 21-ին։
«Կադաստրն ու քաղշինն այն կառույցներն են, որոնց հետ աշխատելիս բախվում ենք մի շարք խնդիրների՝ հողային առումով: Նախկինում մենք անհարկի մերժումներ ունեինք այս կամ այն հողի կարգավիճակը փոխելու առումով, այսինքն՝ լինում էին դեպքեր, որ առաջին անգամ մերժում էին մեզ, սակայն երկրորդ անգամ նույն փաստաթուղթն էինք ուղարկում և չէին մերժում»,-ասաց մարզպետը` հավելելով, որ խոսքը Վերմիշյանի և Պետրոսյանի մասին է:
Վահագն Վերմիշյանի գործով մեղադրանք է առաջադրվել ևս 6 անձի. ԱԱԾ–ն մանրամասներ է հայտնում
Սանոսյանի խոսքով՝ մարզում հողերի և շենքերի օտարման առումով բավական ուշագրավ դեպքեր կան: Նա նշեց, որ Գեղարքունիքում, օրինակ, կա շենք, որը սեյսմակայուն է, սակայն, քանի որ ինչ-որ մեկի աչքն այդ շենքի վրա է եղել, շենքը փաստաթղթերով «դարձել» է ոչ սեյսմակայուն: Բացի այդ, մարզպետը նախորդ տարեվերջին 1500 հա վարելահող է հայտնաբերել, որոնք փաստաթղթավորված չէին, բայց ոմանք այն օգտագործում էին:
Սանոսյանն իր խոսքն ամփոփեց՝ ասելով, որ մարզում ապօրինի օտարումների հետ կապված առաջիկայում աղմկահարույց բացահայտումներ կլինեն, մասնավորապես՝ պետական շենքերի օտարման հետ կապված:
Այդ մարդը մի քիչ իր տեղում չէր. Քաղաքաշինության կոմիտեի նախագահը` Սարհատ Պետրոսյանի մասին
Հիշեցնենք, որ Լոռու մարզպետ Անդրեյ Ղուկասյանը նույնպես հայտնել էր, որ տարբեր տարիների ընթացքում Լոռիում այգիներ, մանկապարտեզներ, շենք ու շինություններ են ապօրինի ձևով յուրացվել, և առաջիկայում նոր բացահայտումներ կլինեն:
