Նախորդ տարում 58․5 միլիոն դրամի շրջանառությունն անցած տնտեսվարողները պետք է ՀԴՄ–ների վրա տպեն ԱՏԳ (ապրանքանիշների դասակարգման համարանիշ) ծածկագրերը, կոդերը։
Որոշ տնտեսվարողներ կարծում են` քանի որ այս դրույթը մնացել է ՓՄՁ-ների վրա՝ անհնար դարձնելով դրանց սպիտակ դաշտ բերելու և աճ ապահովելու նկրտումները, ուստի փոքր ու միջին բիզնեսը դե ֆակտո փորձելու է շրջանցել դա, ցույց չտալ իրական շրջանառությունն ու թաքցնել ըստ այդմ գոյացող հարկերը։ Արմեն Քթոյանի դիտարկմամբ` բիզնեսը կմնա ստվերում, թե ոչ, այնքան էլ ճիշտ մոտեցում չէ, որովհետև ստվերում աշխատելը շանտաժի պես մի բան է, որով շանտաժի են ենթարկում պետությանը, հետևաբար ստվերում աշխատելը որոշ տնտեսվարողների համար դարձել է շանտաժի առարկա։
«Միշտ պետք է գոյություն ունենա սահման` պարզից դեպի բարդն անցնելու կամ պարզից սովորական հարկման ռեժիմ անցնելու համար։ Արտոնյալ, տարբերվող ռեժիմը կիրառվում է փոքր բիզնեսի համար, քանի որ այն ինստիտուցիոնալ առումով բարդ ռեժիմում աշխատելու կարողություններ չունի, սակայն պետք է լինի անցման համար նախատեսված կոնկրետ սահմանագիծ»,– նշում է տնտեսագետը։
Քթոյանի կարծիքով` պետությունը տնտեսվարողին ասում է, որ երբ նա հասնի նշված կետին, նրա հանդեպ խաղի կանոնները կփոխվեն, ուստի տնտեսվարողն իր հերթին սա պետք է ընդունի ի գիտություն, այլ ոչ թե պետությանը ենթարկի շանտաժի` ասելով, որ եթե իրեն ինչ–որ բան են պարտադրում, ապա ինքը կգործի ստվերում։
«Նախորդ կառավարության պարագայում, որն ուներ լեգիտիմության խնդիր, նման փաստարկներն ինչ–որ առումով կարող էին բարոյականության տեսակետից ընկալվել, սակայն ներկայիս լեգիտիմ իշխանության օրոք ՓՄՁ–ների` ստվերում աշխատելու ցանկությունը կդիտվի որպես հակապետական գործողություն։ Ընդամենը պետք է փաստարկներ ներկայացնել կառավարությանը, թե ինչու է նպատակահարմար կոնկրետ սահմանը տեղափոխել ոչ թե 58,5 միլիոնի շեմ, այլ 100 միլիոնի շեմ։ Հարցը կքննարկվի և կգտնվեն լուծման տարբերակներ»,– ասում է տնտեսագետը։
Հայաստանը հեղափոխությունից հետո սկսել է ավելի շատ գումար վճարել ԵԱՏՄ բյուջե
Քթոյանը համոզված է` տնտեսվարողների համար միանշանակ պետք է ամրագրված լինի այն կետը, որից հետո կկատարվի անցում մեկ այլ ռեժիմի։ Ըստ նրա` ընդհանուրից տարբերվող պարզեցված կամ արտոնյալ հարկման ռեժիմն այն պրակտիկան է, որը կիրառվում է փոքրերի պարագայում, որովհետև նրանց մոտ մտնելը, բոլորին հսկելն ու ստուգումներ իրականացնելն իրականում պահանջում են ավելի մեծ ռեսուրսներ և ջանք, քան խոշորների պարագայում։
Տնտեսագետը կարծում է, որ կոնկրետ շեմին առնչվող կետն ավելի շատ ՊԵԿ–ի ընթացիկ կարգավորումների դաշտում է գտնվում։ Հարկային օրենսգրքով ներկայացված է փաստաթղթերի որոշակի ցանկ, որում տեղավորվում է նաև խնդրո առարկան, այլ բան է, որ շատ ու շատ հարցերում տնտեսվարողներն ունեն իրազեկման խնդիր։
«Քաղցր հրաշք». որտեղի՞ց է Հայաստանում հայտնվել էժան շաքարավազը
