ԵՐԵՎԱՆ, 17 փետրվարի — Sputnik. Ազգային ժողովի փոխնախագահ Ալեն Սիմոնյանը` «Իմ քայլը» խմբակցության փակ նիստից հետո լրագրողների հետ զրույցում նշեց, որ ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումից հետո որևէ ռազմական քայլի դիմելու Ադրբեջանի համարձակությունը շատ քիչ է լինելու։
Փետրվարի 15–ին Մյունխենի անվտանգության համաժողովի շրջանակում ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը մասնակցեցին Լեռնային Ղարաբաղի հիմնահարցի վերաբերյալ պանելային քննարկմանը, որը բաց ձևաչափով էր` ուղիղ հեռարձակմամբ, և ներկաները հնարավորություն ունեին նրանց հարցեր տալու։
«Փաշինյան–Ալիև զրույցի համար առաջարկվել էր ֆորմատ, որտեղ մեր հարևան պետության ղեկավարն իրեն շատ անհարմար վիճակում էր հայտնվել, քանի որ այնպես չէ, որ Ալիևը հայտնի է իր հրապարակային խոսքով, այնպես չէ, որ ինքն իր երկրում ժողովրդավարության բարձր մակարդակ ունի։ Դա այն ֆորմատն է, որը մեզ համար ամենահետաքրքիրն ու շահեկանը կարող էր լինել, և այդպես էլ եղավ»,–ասաց Սիմոնյանը։
Փաշինյանը դեմ չի լինի, եթե Ալիևը խոսի հայ ժողովրդի հետ
Նրա խոսքով` սին և արհեստածին խոսակցություններ են հաղորդման ֆորմատի մասին հայտարարությունները, թե այն համապատասխան չէր Ղարաբաղյան հիմնահարցի քննարկման համար։ Սիմոնյանի խոսքով` Փաշինյան–Ալիև զրույցն անսովոր ֆորմաով էր, սակայն վարչապետը նման ֆորմատներից չի վախենում։
ԱԺ փոխնախագահը նշեց նաև, որ զրույցի ֆորմատին համապատասխան վարչապետը ներկայացրել է այն ամենը, ինչը պետք էր ասել։
Հիշեցնենք` փետրվարի 15-ին Մյունխենի անվտանգության համաժողովի շրջանակում տեղի ունեցավ Լեռնային Ղարաբաղի հիմնահարցի վերաբերյալ պանելային քննարկում, որին մասնակցեցին ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը։
Քննարկման ժամանակ Ալիևը հավաքվածներին ներկայացրեց, թե իբր Ղարաբաղն ու Երևանը ադրբեջանական տարածքներ են եղել։ ՀՀ վարչապետ Նիկոլ Փաշինյանն էլ հեգնեց նրան. «Երբ հայոց արքա Տիգրան Մեծը բանակցում էր հռոմեացի զորավար Պոմպեոսի հետ, Ադրբեջանը չկար քարտեզի վրա»։
