ԵՐԵՎԱՆ, 14 փետրվարի — Sputnik, Լաուրա Սարգսյան. Ռուսաստանն ու Վրաստանը կապող ռազմական–վրացական ճանապարհին Քվեշեթի–Կոբի թունելի կառուցումը նաև հայ փոխադրողներին թույլ կտա օրերով արգելափակված չմնալ Վերին Լարսի անցակետի ճանապարհին։ Այս մասին Sputnik Արմենիայի թղթակցի հետ զրույցում ասաց Վրաստանի բեռնափոխադրողների միջազգային ասոցիացիայի գլխավոր քարտուղար Գիա Ցիպուրիան։
Խոսքը Քվեշեթի–Կոբիի (Մցխեթա-Ստեփանծմինդա-Լարս ավտոճանապարհի Կոբի-Գուդաուրիի ամենաբարդ և վտանգավոր հատվածի շրջանցիկ ճանապարհ) մասին է։ Նախօրեին լրագրողների հետ զրույցում տարածաշրջանային զարգացման և ենթակառուցվածքների նախարար Մայա Ցկիտիշվիլին նշել էր, որ այդ հատվածի կառուցումը կմեկնարկի 2020 թվականին։
Վերին Լարսում կնստի դեսպանատան նոր պաշտոնյան. Հայաստանը որոշել է նոր հաստիք բացել
Ձմռանը Կոբի-Գուդաուրին ժամանակ առ ժամանակ փակվում է ձյան պատճառով։ Վերջին անգամ այդ հատվածը փակվել է փետրվարի 7-ին` չորս օրով։ Արդյունքում բեռնատարների 4 կիլոմետրանոց խցանում էր առաջացել։
Վրաստանի իշխանությունները մտադիր են կառուցել 22,7 կմ երկարություն ունեցող ճանապարհ, 6 կամուրջ և 5 թունել, որոնց թվում է նաև Խաչի լեռնանցքի տակով անցնող 9 կիլոմետրանոց թունելը։ Այն կլինի Եվրոպայի ամենաերկար թունելն ու ինժեներական ամենաբարդ շինություններից մեկը։
«Կոբի-Գուդաուրի հատվածը շատ բարդ և վտանգավոր է։ Շրջանցիկ նոր ճանապարհ կառուցելը ձեռնտու է նախևառաջ բեռնատարների համար, քանի որ կիսակցորդներով բեռնատարներն առավել զգայուն են եղանակային վատ պայմանների նկատմամբ։ Տեխնիկապես առանց այն էլ դժվար է կառավարել 16 մետրանոց բեռնատարը։ Իսկ սառցակալած ճանապարհների ժամանակ` առավել ևս»,–ասաց Ցիպուրիան։
Նրա խոսքով` թեթև մարդատար ավտոմեքենաներն ավելի հեշտ են հաղթահարում ձմեռային ճանապարհները։ Հետևաբար, նոր ճանապարհը թույլ կտա նվազագույն ռիսկերով և արագ հասնել Վերին Լարս։
Ցիպուրիան համոզված է, որ շրջանցիկ ուղին կլուծի ռազմական–վրացական ճանապարհի վտանգավոր հատվածի խնդիրը։ Սակայն ամեն ինչ ինժեներական տեսանկյունից պետք է ճիշտ հաշվարկել` թե ինչ թեքությամբ է կառուցվելու ճանապարհը, փորվելու թունելը և մի շարք այլ նրբություններ։
«Քվեշեթի–Կոբին առավելագույնս անվտանգ կդարձնի ճանապարհը բեռնափոխադրողների համար»,–ասաց Ցիպուրիան։
Նա նշեց, որ դա կթեթևացնի բոլոր բեռնափոխադրողների կյանքը։
Միայն Հայաստանից տարեկան Վերին Լարսով բեռնափոխադրողներն առնվազն 10 հազար երթուղի են իրականացնում երկու ուղղությամբ։ Գործող ճանապարհն այսօրվա դրությամբ գրեթե միակն է Հայաստանից Ռուսաստան և հակառակ ուղղությամբ բեռներ փոխադրելու համար։ Կան նաև այլ երթուղիներ, սակայն դրանք քաղաքական պատճառներով փակ են նաև Վրաստանի համար։
Քանի դեռ նոր ճանապարհ չկա, Լարսի միակ այլընտրանքը հայաստանցի բեռնափոխադրողների համար շարունակում է մնալ փոխադրումների մուլտիմոդալ տարբերակը. Երևանից Փոթի երկաթուղով կամ ավտոմեքենայի ճանապարհով, այնտեղից Նովոռոսիյսկի նավահանգիստ լաստանավով, այնուհետև Ռուսաստանի այլ քաղաքներ։
Եթե չլիներ քաղաքական հարցը, Հայաստանն ու Ռուսաստանը կապող առկա 6 ճանապարհներից առավել ձեռնտուն Նար (Հյուսիսային Օսեթիա) – Գորին է, որն անցնում է Հարավային Օսեթիայի տարածքով։ Այն 80 կիլոմետրով ավելի երկար է Լարս տանող ճանապարհից, սակայն օսեթական երթուղին ավելի գերադասելի է լավ կլիմայական պայմանների և ռելիեֆի պատճառով։
«Վերին Լարսում» ՀՀ մաքսային կցորդը շուտով կնշանակվի. նա ներկայացվել է կառավարությանը
