ԵՐԵՎԱՆ, 13 փետրվարի - Sputnik. Քաղաքացիական ավիացիայի կոմիտեի նախագահ Տաթևիկ Ռևազյանն այսօր Ազգային ժողովում պատասխանեց ազգային ավիափոխադրողի ստեղծման անհրաժեշտության մասին հարցին` նշելով, որ պետությունը նախ պետք է որոշի` պատրա՞ստ է արդյոք վճարել ազգային ավիափոխադրողի հնարավոր կիսադատարկ թռիչքների համար։
«Ինձ համար միշտ տարօրինակ է հնչում հարցը` մեզ պե՞տք է ազգային ավիափոխադրող, թե՞ պետք չէ: Այստեղ հարցն այն է, թե ինչպես կարող ենք կառուցել մի փոխադրող, որը կկարողանա մրցակցությանը դիմադրել։ Մենք պատրա՞ստ ենք ունենալ ավիաընկերություն, օրը, օրինակ, դատարկ է թռչելու։ Պատրա՞ստ ենք որպես պետություն ծախսը կրել»,– ասաց նա։
Ռևազյանի խոսքով` բոլորը երազում են թռչել հայկական ավիափոխադրողով: Սակայն պետք է քայլեր ձեռնարկել, որպեսզի ավիափոխադրողը լավ աշխատի, զարգանա և նոր ուղղություններ բացի:
Ryanair ավիաընկերությունը հայտարարել է նոր ուղղություն. Տաթևիկ Ռևազյան
Ըստ Քաղավիացիայի կոմիտեի նախագահի` աշխարհում ընթանում է ավիափոխադրողների համախմբման գործընթաց, քանի որ մրցակցությունն անընդհատ աճում է: Օրինակ` Եվրոպայում ավիաընկերությունների թիվը շուտով կնվազի, դրանք միաձուլվելու են: Արդյունավետ աշխատելու համար այդ ավիափոխադրողներին անհրաժեշտ է 200-300 ինքնաթիռ:
Ռևազյանի ելույթի հետ չհամաձայնեց ԲՀԿ խմբակցության պատգամավոր Միքայել Մելքումյանը՝ նշելով, որ ազգային ավիափոխադրողը պետք է վարի ինքնուրույն քաղաքականություն և կախվածություն չունենա այլ ավիափոխադրողներից։
«Ավիափոխադրողը կարող է աշխատել 30-40 ինքնաթիռով: Ես հաստատ չեմ կիսում ձեր տեսակետը: Անհրաժեշտ է, որ ինքնուրույն ազգային ավիափոխադրող հայտնվի», - նշեց նա:
Մելքումյանը նաև դժգոհեց, որ թռիչքների մեծ մասը տեղի է ունենում գիշերը:
Ռևազյանը պարզաբանեց, որ դա պայմանավորված է նրանով, որ Հայաստանից թռիչքների մեծ մասը տրանզիտային է, և ավիաընկերությունները այնպես են կազմակերպում, որ ուղևորները ժամանակ ունենան հետագա թռիչքների համար:
«Եթե կարծում եք, որ նրանք անում են դա, որպեսզի վիրավորեն Հայաստանին, ապա դա այդպես չէ: Ավիաընկերության համար գիշերը թռչելն ավելի թանկ է», - նշեց Ռևազյանը:
Ի՞նչ է պետք իմանալ Ryanair-ով ճամփորդելիս
Ավելի վաղ Ռևազյանը հայտարարել էր, որ Հայաստանի ազգային փոխադրողի կարգավիճակ կարող է տրվել միայն ուժեղ տեղական ավիաընկերությանը, սակայն դրա մասին խոսելը դեռ վաղ է:
