Ճամպրուկներ, տուփով կոնֆետներ, ակնոց, ժամացույց, մանկասայլակներ. «Զվարթնոց» օդանավակայանի հատուկ պահպանվող գոտում և օդանավում մոռացված իրերի ցանկը շատ բազմազան է։ Աշխարհի գրեթե բոլոր օդանավակայաններում գործում են ծառայություններ, որոնք զբաղվում են կորցրած ուղեբեռի և մոռացած իրերի հայտնաբերմամբ և վերադարձով։ Երևանի «Զվարթնոց» օդանավակայանի կորցրած և գտած իրերի բաժինն աշխատում է 24/7 ռեժիմով։
Բաժնի ղեկավար Գուրգեն Մանուկյանը վստահեցնում է` բոլոր կորցրած իրերը պահվում են հատուկ սենյակում, որտեղ շուրջօրյա տեսանկարահանում է իրականացվում։ Դրանք հետո վերադարձվում են անուշադիր ուղևորներին։ Իրերը պահեստարան ուղարկելուց առաջ դրանք կշռում և զննում են։ Ամռան շրջանում պահեստարանի դարակների վրա ազատ տեղ չի լինում, ձմռան շրջանում համեմատաբար ավելի հանգիստ իրավիճակ է։ Ծառայության պահեստում մոռացած իրերը պահվում են ընդամենը մեկ շաբաթ, որից հետո ուղարկվում են այն ավիաընկերություն, որի ուղևորը մոռացել կամ կորցրել է դրանք։
«Հաճախ դյութի ֆրիում գնումներ կատարելիս կամ նստեցումից առաջ կատարվող զննումից հետո մոռանում են նաև փաստաթղթերը։ Եթե գումար են թողել կամ թանկարժեք իրեր, ապա դրանք հայտնաբերելուց հետո անմիջապես փոխանցում ենք ոստիկանությանը», – պատմեց Մանուկյանը։
Ryanair ավիաընկերությունը հայտարարել է նոր ուղղություն. Տաթևիկ Ռևազյան
Ծառայության հատուկ սենյակում պահվում է նաև ուղեբեռ, որը սխալ հասցեով է եկել, կամ ուշացել է, կամ պարզապես այն կորցրել են։ Նման դեպքերում ճամպրուկներին հատուկ պիտակներ են փակցվում և մեկ շաբաթ անց ուղարկվում նույն ավիաընկերության չվերթով։ Կորցրած և գտած իրերի բաժնի ղեկավարը խորհուրդ է տալիս ճամպրուկներին հատուկ սթիքերներ փակցնել կամ լրացնել հատուկ քարտեր, որպեսզի կորստի դեպքում այն հեշտ գտնեն ու վերադարձնեն։
«Հաճախ ուղեբեռը չեն կարողանում գտնել, որովհետև ուղևորները սխալ են նկարագրում այն կամ չափազանցնում են ճամպրուկի պարունակությունը», – նշեց նա։
Զենք, փամփուշտներ, գումար ու թանկարժեք իրեր. «Զվարթնոցում» ամփոփել են 2019-ի «պատահարները»
Մանուկյանը բացառեց այն վարկածը, թե իբր կոնտեյների վրա երեք պտույտից հետո իրերը կորցրած են համարվում։ Նրա խոսքով` բավականին երկար ժամանակ այնտեղ մնալով` ծառայության աշխատակիցները դրանք դնում են հատուկ գծված դեղին քառակուսու մեջ, այնտեղ ուղեբեռը որոշ ժամանակ մնալուց հետո վերցնում տանում են կորցրած իրերի բաժին և սկսում ձևակերպել այն պահեստարանում տեղավորելու համար։
