ԵՐԵՎԱՆ, 10 փետրվարի — Sputnik. Առևտրի և զարգացման սևծովյան բանկը 10 միլիոն դոլար կտրամադրի հայկական բանկերից մեկին փոքր ու միջին բիզնեսը վարկավորելու համար։ Վարկային համաձայնագիրն այսօր ՀՀ կենտրոնական բանկում ստորագրել են ԿԲ գործադիր տնօրեն Արամ Խաչատրյանն ու Առևտրի և զարգացման սևծովյան բանկի նախագահ Դմիտրի Պանկինը։
Միջոցները տրամադրվելու են դոլարային վարկերի համար։ Դրանցից կկարողանան օգտվել փոքր ընկերությունները, որոնք արտասահմանից նյութեր ու հաստոցներ են գնում, կամ ապրանք են արտահանում։
Նախկինում բանկն արդեն երկու անգամ 5 միլիոնի ու մեկ անգամ 10 միլիոնի չափով վարկեր ստացել էր Սևծովյան բանկից (փոքր բիզնեսի հետագա վարկավորման համար)։ Այլ բանկերին ու վարկային կազմակերպություններին էլ են նման վարկեր տրամադրվել։
«Իհարկե, ոչ մի երկիր չի կարող զարգանալ առանց փոքր ու միջին բիզնեսի։ Այստեղ աշխատատեղեր ու նոր ապրանքներ, ծառայություններ են ստեղծվում», – ավելացրեց Պանկինը։
Բանկի գործը ռիսկի դիմելն է. հաճախորդները վարկի տակ են, բայց էլի են դիմում վարկ ստանալու
Այս, ինչպես և նախորդ տարի Սևծովյան բանկը պատրաստվում է 40 միլիոն դոլար տեղաբաշխել Հայաստանում։ Դիտարկվում է նաև հայկական դրամով նոր արժեթղթերի թողարկման հնարավորությունը։ Բանկն արդեն արժեթղթեր տեղաբաշխել էր 2017 թվականին։
«Քննարկվում են նաև ենթակառուցվածքային նախագծերում նոր ներդրումներ անելու հնարավորությունները։ Մենք արդեն ներդրում ենք արել օդանավակայանի հիմնանորոգման մեջ, աշխատում ենք մի քանի խոշոր ձեռնարկությունների հետ, այժմ մտածում ենք ենթակառուցվածքային նախագծերին մասնակցելու ուղղությամբ», – ավելացրեց Պանկինը։
Քաղաքապետարանը կօգնի նոր բնակարան ձեռք բերելու գործընթացում խուսափել խաբեբաներից
Հիշեցնենք` Հայաստանում աշխատելու տարիներին Սևծովյան բանկը հավանություն է տվել 37 ծրագրի, որոնց ընդհանուր արժեքը 277 միլիոն եվրո է։
