ԵՐԵՎԱՆ, 6 փետրվարի — Sputnik. Սահմանադրության մեջ փոփոխություններ կատարելու համար պետք է ձևավորվի հանձնաժողով` ՀՀ վարչապետի, կառավարության նախաձեռնությամբ։
Այսօր ԱԺ արտահերթ նիստում «Իմ քայլի» ներկայացրած «Սահմանադրական փոփոխությունների» նախագծի քննարկման ժամանակ իր ելույթում այսպիսի հայտարարություն արեց «Լուսավոր Հայաստան» խմբակցության պատգամավոր Տարոն Սիմոնյանը։
«Ի՞նչ խնդիր ունեք։ Սահմանադրական փոփոխությունների նորմալ ընթացակարգով և՛ ձեր ասած ՍԴ խնդիրը պետք է լուծվի, և՛ ամբողջ դատական համակարգի խնդիրը։ Ինչո՞ւ եք խուսափում նորմալ, համակարգային փոփոխություններից և ընտրում եք մակերեսային ճանապարհները»,– ասաց Սիմոնյանը` ԱԺ ամբիոնից դիմելով խորհրդարանական մեծամասնությանը։
Կրակում է ինքն իր ոտքին. Մարուքյանը կարծում է` իշխանությունն ընտրել է հանրաքվեի տարբերակը
Տարոն Սիմոնյանը հիշեցրեց, որ դատական բարեփոխումների վերաբերյալ Վենետիկի հանձնաժողվը զգուշացրել էր, որ Հայաստանում չի կարող ստեղծվել մի իրավիճակ, որ դատավորների մեծ մասը միանգամից դուրս գան աշխատանքից, քանի որ դա կառաջացնի հակասահմանադրական իրավիճակ։
«Ձեր այս նախագիծը միանգամից հակասահմանադրական վիճակ է ենթադրում, եթե ՍԴ 6-7 դատավոր միանգամից դուրս գան»,– ասաց նա։
Բացի այդ, Տարոն Սիմոնյանը նշեց նաև, որ Սահմանադրության փոփոխության նախագիծը կարող է հանրաքվեի դրվել միայն երկրորդ ընթերցմամբ տապալվելու դեպքում։
«Ձեր ցավը տանեմ, ախր կարելի է, չէ՞ Սահմանադրության 202–րդ հոդվածի 3-րդ մասը կարդալ, հետո մի հատ էլ բացել ԱԺ Կանոնակարգ օրենքի 86-րդ հոդվածի 4–րդ մասի 2-րդ կետը կարդալ` հասկանալու համար, որ առաջին ընթերցմամբ տապալումից հետո դուք չեք կարողանա հանրաքվեի դնել այս հարցը»,– ասաց Սիմոնյանը։
Նրա մեկնաբանմամբ, հանրաքվեի դրվելու համար նախագիծը պետք է առաջին ընթերցմամբ հաստատվի, ապա ներկայացվի ՍԴ, որտեղից դրական եզրակացություն ստանալուց հետո երկրորդ ընթերցմամբ քվեարկության ժամանակ տապալվի Ազգային ժողովում։
Համայնքը զորավոր է. անցանկալի գյուղապետների ճակատագիրը կորոշվի հանրաքվեով
«Դրանից հետո միայն դուք կարող եք այն դնել հանրաքվեի։ Ախր, կարելի է, չէ, այսքան բանը կարդալ։ Չի՛ կարելի այդքան մակերեսային նայել ամեն ինչին,– ասաց նա,–Հիմա, որ մասնավոր ոլորտում լինեի, այսքան խորհրդատվության համար բավականին կհարստանայի։ Բայց ոչ մի դրական բան ձեզանից չեմ ստանում, միայն բացասական ժպիտներ»։
Հիշեցնենք` այսօր ԱԺ արտահերթ նիստի քննարկմանը ներկայացրած վերջնական նախագծով «Իմ քայլն» առաջարկում է ՀՀ Սահմանադրության 213–րդ հոդվածի փոփոխությունը դնել համաժողովրդական հանրաքվեի։
Այսօր 5 ժամ տևողությամբ արտահերթ նիստում նախատեսվում է նախագիծը հաստատել առաջին ընթերցմամբ։
Երկրորդ ընթերցումն ամենայն հավանականությամբ կկայանա արդեն ՍԴ–ի դրական եզրակացությունն ստանալուց հետո, քանի որ Սահմանադրության փոփոխության նախագիծը հանրաքվեի դնելու վերաբերյալ Ազգային ժողովի որոշման նախագծից բացի հիմնական նախագծին կցված է նաև այլ նախագիծ, որը վերաբերում է Սահմանադրության փոփոխությանը վերաբերող հարցով Սահմանադրական դատարան դիմելուն։
Սահմանադրական դատարանում ստեղծված իրավիճակը շուտով կհանգուցալուծվի. Փաշինյան
