ԵՐԵՎԱՆ, 5 փետրվարի — Sputnik. ՀՀ վարչապետ Նիկոլ Փաշինյանը ցավակցական հեռագրեր է հղել Չինաստանի Ժողովրդական Հանրապետության նախագահ Սի Ծինփինին և Չինաստանի Ժողովրդական Հանրապետության վարչապետ Լի Կեցյանին՝ կորոնավիրուսի բռնկման կապակցությամբ:
Այս մասին տեղեկացնում են ՀՀ կառավարության մամուլի ծառայությունից։
«Չինաստանի համար դժվարին այս պահին հայ ժողովրդի և անձամբ իմ անունից թույլ տվեք խորին ցավակցություն ու զորակցություն հայտնել Ձեզ և բարեկամ չինացի ժողովրդին կորոնավիրուսի բռնկման կապակցությամբ, որն արդեն իսկ պատճառ է հանդիսացել հարյուրավոր մարդկային զոհերի»,– ասված է ՉԺՀ նախագահին ուղղված ցավակցական հեռագրում։
ՀՀ վարչապետը հիշեցրել է, որ Չինաստանն իր բազմադարյա պատմության ընթացքում դիմակայել է բազմաթիվ մարտահրավերների ու փորձությունների և միշտ պատվով հաղթահարել դրանք: «Վստահ ենք, որ այս անգամ նույնպես, Ձեր իմաստուն և հեռատես ղեկավարման ներքո, Չինաստանին կհաջողվի հաղթահարել այս աղետի ծանր հետևանքները և վերականգնել երկրի խաղաղ ու ապահով մթնոլորտը»,–գրել է Փաշինյանը:
Կորոնավիրուսի ախտորոշիչ թեստերն ավելանում են. Հայաստանն ԱՀԿ–ից ևս 200-ը կստանա
Չինաստանի վարչապետին ուղղված ցավակցական հեռագրում նշված է ՀՀ վարչապետը նշել է, որ համոզված է` նրա ղեկավարության ներքո Չինաստանի կառավարության կողմից ձեռնարկվող միջոցառումները թույլ կտան հաղթահարել այս աղետի ծանր հետևանքները և վերականգնել երկրի բնականոն ընթացքը:
Վերջում ՀՀ կառավարության ղեկավարը չինացի բարեկամ ժողովրդին համբերություն ու ոգու տոկունություն է մաղթել։
Հիշեցնենք, որ փետրվարի 4–ի տվյալներով` Չինաստանում կորոնավիրուսով վարակվածների ընդհանուր թիվը հասել է 20 հազար 438 մարդու, 425–ը մահացել են։ Մեկ օր առաջ պաշտոնապես հայտարարվել էր 17 205 հիվանդների և 361 մահացածների մասին։
