ԵՐԵՎԱՆ, 5 փետրվարի – Sputnik. Գյումրիում մանկահասակ երեխայի սպանության մեջ մեղադրվող Անի Մինասյանի գործով այսօրվա դատական նիստը հետաձգվեց՝ հանրային պաշտպան Ժորա Պետրոսյանի միջնորդությամբ:
Նիստի մեկնարկից րոպեներ անց Պետրոսյանը Շիրակի մարզի ընդհանուր իրավասության առաջին ատյանի դատարանին նիստը կես ժամով հետաձգելու միջնորդություն ներկայացրեց` դատագենետիկական փորձաքննության եզրակացությանը ծանոթանալու համար (եզրակացությունը կցված է գործին որպես ապացույց):
![Ինչու հետաձգվեց Գյումրիում 1 տարեկան դստեր սպանության մեջ մեղադրվող կնոջ գործով դատը Ինչու հետաձգվեց Գյումրիում 1 տարեկան դստեր սպանության մեջ մեղադրվող կնոջ գործով դատը - Sputnik Արմենիա](https://cdn.am.sputniknews.ru/img/2195/30/21953075_0:0:1573:1180_600x0_80_0_0_823567287eef67f0b7d368a2298616ca.jpg)
Ավելի ուշ, վերադառնալով նիստերի դահլիճ, պաշտպանը նիստը մի քանի օրով հետաձգելու միջնորդություն ներկայացրեց ՝ այդ եզրակացությանը ամբաստանյալի հետ ավելի մանրամասն ծանոթանալու և պաշտպանական մարտավարություն ընտրելու նպատակով:
Դատախազն ու տուժողի իրավահաջորդը չառարկեցին: Դատարանը որոշեց հաջորդ դատական նիստը հրավիրել մարտի 3-ին:
![Ինչու հետաձգվեց Գյումրիում 1 տարեկան դստեր սպանության մեջ մեղադրվող կնոջ գործով դատը Ինչու հետաձգվեց Գյումրիում 1 տարեկան դստեր սպանության մեջ մեղադրվող կնոջ գործով դատը - Sputnik Արմենիա](https://cdn.am.sputniknews.ru/img/2195/30/21953065_0:0:1600:1200_600x0_80_0_0_fa46bd5777ab650b15d2dfe673f86089.jpg)
Ի դեպ, ամբաստանյալի ցանկությամբ, դատարանը որոշեց թույլ չտալ զանգվածային լրատվամիջոցների ներկայացուցիչներին տեսանկարահանել ամբաստանյալին կամ հրապարակել նեղ անձնական փաստերը:
Հիշեցնենք` 2019–ի օգոստոսի 31–ին Գյումրու Բուլվարային թաղամասի աղբանոցում մոտ 1 տարեկան աղջիկ երեխայի դի էր հայտնաբերվել։ Ավելի ուշ Քննչական կոմիտեն հայտնել էր, որ Գյումրիում բնակվող մի կին կպչուն ժապավենով կապել է իր՝ 2018-ի սեպտեմբերին ծնված դստեր ձեռքերն ու ոտքերը, բերանին փաթաթել կիսաշրջազգեստ։ Հետո երեխային տեղափոխել և դրել է փողոցում տեղակայված աղբարկղերից մեկի մեջ։ Նախաքննության ընթացքում նշանակված դիակի դատաբժշկական փորձաքննության եզրակացության համաձայն՝ մանկահասակ երեխան մահացել է մեխանիկական շնչահեղձությունից՝ սննդային զանգվածով շնչառական ուղիների փակման հետևանքով:
Երեխայի մորը մեղադրանք է առաջադրվել սպանության հատկանիշներով։
«Նա չէր սպանի». գյումրեցի տղամարդը` 1 տարեկան դստեր սպանության մեջ մեղադրվող հարսի մասին