ԵՐԵՎԱՆ, 5 փետրվարի – Sputnik. ՀՀ առողջապահության նախարարության մամուլի ծառայությունը հայտնում է, որ Հայաստանում մինչ օրս կորոնավիրուսային վարակին բնորոշ կասկածելի ախտանշաններ ունեցող 40 պացիենտ է հոսպիտալացվել, որոնցից 26-ը դուրս է գրվել (դուրս գրումները շարունակվում են), 14 պացիենտ դեռևս հոսպիտալացված է:
Նախարարության տվյալներով` հունվարի 27-ից մինչ օրս Հայաստան է ժամանել 859 անձ, որոնց նկատմամբ սահմանվել է հսկողություն՝ ըստ բնակության վայրի:
«Բոլորը ստացել և ստանում են ախտանշանային բուժում, անհրաժեշտության դեպքում կազմակերպվում են լաբորատոր հետազոտությունները: Արդյունքում` եզակի դեպքերում հայտնաբերվել են գրիպի Ա տեսակի հարուցիչներ, ռինովիրուսներ, իսկ նոր կորոնավիրուսի հետազոտության արդյունքները եղել են բացասական»,- նշված է նախարարության տարածած հաղորդագրության մեջ:
Նշվում է, որ Առողջապահության համաշխարհային կազմակերպությունը Հայաստանին կտրամադրվի լաբորատոր թեստերի նոր խմբաքանակ:
Նախարարությունից ևս մեկ անգամ հիշեցնում են, որ Առողջապահության համաշխարհային կազմակերպության համաձայն՝ վարակը փոխանցվում է օդակաթիլային և կոնտակտային (սերտ շփման) ճանապարհով՝ մարդուց մարդ, իսկ Չինաստանում՝ նաև կենդանիներից մարդուն:
Չինաստանից Ռուսաստան. ՀՀ քաղաքացի Լյուդմիլա Բաղդասարյանին տարհանել են
Մրգերի կամ ծանրոցների մակերեսների վրա հարուցիչը չի կարող երկար գոյատևել և հանդիսանալ վարակի տարածման աղբյուր:
Ըստ առողջապահության նախարարության` Հայաստանում այս պահին իրավիճակը վերահսկելի է, նոր կորոնավիրուսային վարակի դեպքեր չեն արձանագրվել, ձեռնարկվում են անհրաժեշտ բոլոր կանխարգելիչ միջոցառումները՝ համագործակցված շահագրգիռ կառույցների և միջազգային կազմակերպությունների հետ:
Ինչպես չինացին Հայաստան եկավ «չինական» վիրուսից մեկ ամիս առաջ ու սիրահարվեց մեր երկրին
Չինաստանում նոր կորոնավիրուսներով (2019-nCoV) պայմանավորված համաճարակային իրավիճակը դեռևս լարված է: Առողջապահության համաշխարհային կազմակերպության փետրվարի 4-ի տվյալների համաձայն` Չինաստանում արձանագրվել է 20471 հաստատված դեպք` 425 մահվան ելքով, իսկ աշխարհում գրանցվել է 20630 հաստատված դեպք:
Ըստ չինական աղբյուրի՝ փետրվարի 5-ի, ժամը 10:00-ի դրությամբ արձանագրվել է կասկածելի 23260 դեպք, հաստատված 24367 դեպք` 492 մահվան ելքով, առողջացել է 898 հիվանդ:
