Բենիամին Պողոսյանը նշում է, որ կարգավորման պլանը պատրաստ էր վաղուց, պարզապես ամերիկացիներն ասում էին, որ սպասում են Իսրայելի խորհրդարանական ընտրությունների արդյունքներին, որպեսզի համագործակցեն ձևավորվելիք նոր կառավարության հետ ու նրան ներկայացնեն կարգավորման պլանը:
«Բայց Իսրայելի պատմության մեջ տեղի ունեցավ աննախադեպ երևույթ. երկու անգամ կայացան խորհրդարանական ընտրություններ, սակայն կառավարությունն այդպես էլ չձևավորվեց: Մարտի սկզբին կկայանա երրորդ ընտրությունը, իսկ ամերիկացիները հայտարարել են, որ այլևս չեն կարող սպասել ու ներկայացրել կարգավորման պլանը»,- նշում է վերլուծաբանը:
Բենիամին Պողոսյանի փոխանցմամբ՝ հատկանշական է, որ կարգավորման ամերիկյան տարբերակին կողմ են և՛ Իսրայելի վարչապետ Նեթանյահուն, և՛ իսրայելական ընդդիմության առաջնորդ Գանցը: Նրանց երկուսին էլ կանչել էին Վաշինգտոն:
«Ես լավատեսորեն սպասում եմ...». Սարգսյանի բացառիկ հարցազրույցը Իսրայելում. տեսանյութ
Բենիամին Պողոսյանի կարծիքով՝ հակամարտության կարգավորման առաջարկվող պլանը նախկինում եղածներից ամենաիսրայելամետն է: Ընդ որում՝ Նեթանյահուի ընտրազանգվածն ավելի ազգայնական կամ աջակողմյան հատվածն է, որի համար ԱՄՆ-ի կողմից ներկայացված ծրագիրը հավելյալ խթան է՝ հասկանալու, որ Նեթանյահուն կարողացավ անել այն, ինչը չէր հաջողվել Իսրայելի նախկին վարչապետերին: Այսինքն՝ առաջին անգամ կա մի պլան, որը չի պնդում 100 տոկոսանոց վերադարձ մինչև 1967թ.- ի վեցօրյա պատերազմը եղած սահմաններին:
