Մանվել Սարգսյանի դիտարկմամբ՝ հայտարարության տեքստում պարզ գրված է, որ քննարկվել են խնդրի կարգավորման բաղադրիչները, սկզբունքները և դրանց իրագործման հնարավորությունները: Ըստ Սարգսյանի՝ Ադրբեջանը դեռևս դեկտեմբերին Բրատիսլավայում կայացած հանդիպման նախօրեին նախանշել էր կարմիր գիծը, որի իմաստն այն էր, որ կարգավորման հիմքում պետք է լինի Ադրբեջանի սահմանադրությունը, այլ ոչ թե Մինսկի խմբի կոնցեպտը կամ առաջարկը:
«Դրանից հետո համանախագահները հայտարարությամբ հորդորեցին ոչինչ չփոխել և առաջ շարժվել իրենց առաջարկների հիման վրա, սակայն ադրբեջանական կողմը մինչ օրս այդ կապակցությամբ լռում է: Պատահական չէ, որ գրել են, թե բանակցություններն ընթացել են համանախագահների օրակարգով, և ինչ-որ տեղ Ադրբեջանին պարտադրել են ստորագրել դրա տակ: Թերևս դրանով էր պայմանավորված այն հանգամանքը, որ բանակցությունները տևեցին այդքան երկար»,- նշեց քաղաքագետը:
Նրա գնահատմամբ՝ եթե Ադրբեջանը հրաժարվեր օրակարգից, ապա բանակցությունները կանգ կառնեին, այդ գործընթացի իմաստը կկորչեր: Ընդ որում՝ պայմանավորվածությունն այնպիսին է եղել, որ երկու ԱԳՆ-ների խոսնակները պրակտիկորեն ներկայացրել են նույն տեքստը: Ուրեմն բանակցող կողմերին, ըստ Սարգսյանի, ասել են, որ չեք գնում և զբաղվում հեքիաթներով, այլ ասում եք այն, ինչը բխում է ընդհանուր հայտարարությունից:
Հայաստանի և Ադրբեջանի ԱԳ նախարարներն ու ԵԱՀԿ ՄԽ-ն համատեղ հայտարարություն են տարածել
Սարգսյանի կարծիքով՝ Մինսկի խմբի դիրքորոշումը բանակցություններում ղարաբաղյան կողմի վերադարձի հետ կապված այնպիսին է, որ եթե Հայաստանն ու Ադրբեջանը համաձայնեն, ապա դա տեղի կունենա, ինչի մասին համանախագահները նույնպես հայտարարել են:
Նշենք, որ Ժնևում հունվարի 29–30–ին կայացել է Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը` ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրչիկի միջնորդությամբ և մասնակցությամբ:
