ԵՐԵՎԱՆ, 31 հունվարի — Sputnik. ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը, յուրահատուկ ձևով շնորհավորել է մոր` Բելլա Քոչարյանի 66–րդ տարեդարձը։ Լևոն Քոչարյանը Facebook սոցիալական ցանցում տեղադրել է հոր` Ռոբերտ Քոչարյանի «Կյանք ու ազատություն» գրքից մի հատված` տեսանյութի տեսքով։
«Ծնունդդ շնորհավոր, իմ ուժեղ մամա»,–գրել է նա։
Լևոն Քոչարյանի տարածած տեսանյութում հոր գրքի այն հատվածն է, որտեղ նա պատմում է` որտեղի՞ց է ճանաչում կնոջը։ Նշվում է, որ Քոչարյանը ապագա կնոջ հետ նույն մանկապարտեզն է հաճախել, դպրոցում էլ 4 տարի նույն դասարանում են սովորել։
«Նա միշտ ինձ դուր է եկել, բայց քնարական ընկերություն մեր միջև այդպես էլ չեղավ։ Բելլան ինձ համարյա չէր նկատում։ Չափից դուրս համեստ էի։ Դպրոցական կյանքին համարյա չէի մասնակցում, իսկ նա ակտիվիստ էր, օրինակելի գերազանցիկ։ Դպրոցից հետո կորցրեցի նրան տեսադաշտիցս, ու ճակատագիրը մեզ նորից հանդիպեցրեց, երբ արձակուրդներին եկել էի տուն։ Ամուսնացանք 1980–ի աշնանը»,– նշվում է մեջբերման մեջ։
Տեսանյութում խոսվում է նաև Բելլա Քոչարյանի բացառիկ տոկուն մարդ լինելու մասին. նա երբեք չի տրտնջում և նույնիսկ ամենածանր պահերին լուռումունջ տանում է բոլոր դժվարությունները։
Հիշեցնենք, որ Sputnik Արմենիան դեռ 2019–ի մարտին հարցազրույց էր արել Բելլա Քոչարյանի հետ։ Նա պատմել էր, որ քաղաքական և պետական գործչի կին լինելը դժվար է, որովհետև մեծ պատասխանատվություն է ենթադրում։ Նրա խոսքով` ամեն օր պետք է ապրես և աշխատես բոլորի աչքի առաջ և պատրաստ լինես տհաճ բաների` խիստ քննադատության, հանկարծակի հնչած խճճող հարցի, քծնանքի և գործող իշխանության մերձավոր շրջապատում գտնվելու ոմանց «պաթոլոգիկ» ցանկությանը։
Երկրորդ անգամ առանց հեղինակի․ Երևանում կայացավ Ռոբերտ Քոչարյանի գրքի շնորհանդեսը
Տիկին Քոչարյանը, պատմելով իր առօրյայի մասին` նշել էր, որ օրը սկսում է առավոտյան 6։30–ին. արթնացնում է թոռներին, ինչը, անկեղծ ասած, հեշտ գործ չէ, հատկապես փոքրիկ Բելլայի դեպքում, որը սիրում է քնել։ Իսկ մյուս թոռները` Անին և Էմման, արթնանում են առանց դժվարության։ Հենց նախաճաշի սեղանի շուրջ էլ նա փորձում է զրույցի որոշակի տոն պահպանել, ինչ–որ կարևոր բան սովորեցնել ու դաստիարակել նրանց` չհասցնելով առարկություններ չհանդուրժող բարոյախրատության։ Իսկ տղա թոռնիկների` Ռոբերտի, Միքայելի և Դավիթի հետ, դեռ վաղ է նման զրույցներ վարել։
Նշենք, որ Ռոբերտ և Բելլա Քոչարյաններն ունեն երեք զավակ և վեց թոռնիկ։
Որտեղ են հանդիպել Վլադիմիր Պուտինն ու Բելլա Քոչարյանը և ինչ են քննարկել
Ռոբերտ Քոչարյանն այժմ կալանքի տակ է. նրան մեղադրանք է առաջադրվել 2008 թ–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ-ին Քոչարյանին երկու անգամ ձերբակալեցին: 2019 թվականի հունիսի վերջին նա ձերբակալվեց երրորդ անգամ:
