ԵՐԵՎԱՆ, 28 հունվարի – Sputnik. «Քաղաքացիական գիտակցություն» ՀԿ նախագահ Նարեկ Սամսոնյանը բերման է ենթարկվել։ Տեղեկությունը Facebook-ի իր էջում գրել է ԱԺ նախկին պատգամավոր Միհրան Հակոբյանը։
«Նարեկ Սամսոնյանն այսօր ողջ օրվա ընթացքում ոստիկանների և լրագրողների աչքի առջև Ոստիկանության դիմաց կանգնած էր: Բերման ենթարկվածների ազատ արձակվելուց հետո գնաց տուն, բայց տուն չհասավ, որովհետեւ դիմակավորված անձիք հենց նոր բերման են ենթարկել Ոստիկանություն: Գժի կինո: Գնում են Ոստիկանություն»,–տեղեկացրել է նա:
Սամսոնյանի բերման ենթրակվելուն ֆեյսբուքյան ուղիղ հեռարձակմամբ, Ոստիկանություն գնալու ճանապարհին անդրադարձել է նաև իրավապաշտպան Ռուբեն Մելիքյանը` նշելով, որ ապշած է կատարվածից։
«Ինձ մոտ կար վստահություն, որ այսօրվա հրահանգը վերաբերել է նաև Նարեկ Սամսոնյանին։ Ես առաջարկեցի նրան, որ ինքս իմ մեքենայով հասցնեմ իրեն տուն՝ բակ, ու անմիջապես այդ պահին Նարեկ Սամսոնյանի նկատմամբ էլի բռնի ձևով, էլի դիմակավորված ճանապարհով, նույն ձեռագրով իրականացվեց գործողություն ու նա բերման ենթարկվեց։ Սա արդեն աբսուրդի ժանրից է», - ասաց Ռուբեն Մելիքյանը։
«Ադեկվադ» կուսակցության ղեկավար Արթուր Դանիելյանն ազատ արձակվեց
Նա նշեց, որ հիմա նորից գնում է ոստիկանության 6-րդ վարչության մոտ, որտեղ այսօր ամբողջ օրն է անցկացրել և արդեն ոստիկանապետի պաշտոնակատարից պահանջելու է պարզաբանումներ այս իրավիճակի կապակցությամբ։
Հիշեցնենք, որ այսօր ավելի վաղ բերման էին ենթարկվել ՎԵՏՕ նախաձեռնության հիմնադիր Նարեկ Մալյանը, «Ադեկվադ» միաբանության հիմնադիր Արթուր Դանիելյանն ու միաբանության երեք անդամները։
