ԵՐԵՎԱՆ, 27 հունվարի— Sputnik. ՀՀ սննդամթերքի անվտանգության տեսչական մարմինը հայտնում է, որ Սիսիանի մանկապարտեզներին կարագի փոխարեն սփրեդ են մատակարարել։
«Սննդամթերքի անվտանգության տեսչական մարմինը 2020թ. հունվարի 20-ին Սյունիքի Սիսիան քաղաքի համայնքապետարանից ստացել է գրության, որում կասկածներ են եղել, թե մանկապարտեզներին մատակարարվող կարագը չի համապատասխանում պայմանագրով նախատեսված չափանիշներին: Տեսչական մարմնի մասնագետները վերահսկողական միջոցառումներ են անցկացրել»,–նշված է հաղորդագրության մեջ։
Մանկապարտեզներից նմուշառում է իրականացվել, արդյունքները ներկայացվել են լաբորատոր փորձաքննության:
Պարզվել է, որ մանկապարտեզների մատակարար հանդիսացող «Սիսիանի Հաց» ՍՊԸ-ն որպես «սերուցքային կարագ» մատակարարել է «Крестянское Раздолье» անվանմամբ ապրանքատեսակ` կից ներկայացնելով Ռուսաստանի ««Молочный комбинат» Светловодский» կազմակերպության համապատասխանության հայտարարագրերը:
Կազմակերպության հայտարարագրերում բացակայել են «Крестянское Раздолье» ապրանքատեսակի մասին հղումները: Բացի այդ, ապրանքի արկղի ուսումնասիրությունը ցույց է տվել, որ դրա վրա առկա մակնշումը կրկնապիտակ է և արտադրողի բնօրինակ մակնշումը բացակայում է:
Տեսչական մարմնի մասնագետները կապ են հաստատել նաև Ռուսաստանի ««Молочный комбинат» Светловодский» կազմակերպության հետ, որի տնօրենը պաշտոնապես հերքել է իրենց կապը տվյալ ապրանքատեսակի հետ։ Վերջինս նաև հայտնել է, որ «Крестянское Раздолье» ապրանքանիշով արտադրանք իրենց կողմից չի արտադրվում:
Որպես ներմուծող կրկնապիտակի վրա նշված է եղել Ա/Ձ Վիգեն Ստեփանյանը, որի գործունեությունը, սակայն, համաձայն ՊԵԿ պաշտոնական կայքի, ժամանակավորապես դադարեցված է: Կրկնապիտակի տակ առկա մասամբ ջնջված մակնշման հետքերի վերծանումից պարզվել է, որ տուփի պարունակությունը Ռուսաստանի «ДМФ» կազմակերպության կողմից արտադրված բուսակաթնային արտադրանք է՝ «սփրեդ»:
Կարա՞գ, թե՞ ալպիական. ո՞րն է հոգեպես ավելի ազնիվ… Օգտատիրոջ ահազանգի «յուղածո» հետքերով
«Հանրապետական անասնաբուժասանիտսրական և բուսասանիտարական լաբորատոր ծառայությունների կենտրոն» ՊՈԱԿ-ից ստացված փորձաքննության արդյունքները ևս փաստել են, որ ապրանքատեսակն իր ճարպաթթվային կազմով չի համապատասխանում կարագին ներկայացվող պահանջներին և պարունակում է բուսական յուղեր:
Սիսիանի մանկապարտեզներում առկա խմբաքանակների իրացումը կասեցվել է, ձեռնարկվում են անհրաժեշտ միջոցներ կեղծիքի ամբողջ շղթան բացահայտելու ուղղությամբ:
