Անշարժ գույքի վաճառքով ու գնահատմամբ զբաղվող «Ռեդ գրուպ» ընկերության բիզնեսի զարգացման գծով տնօրեն Էդուարդ Ապրիյանը Sputnik Արմենիայի հետ զրույցում նշեց, որ 2019 թվականն ամփոփվել է բավականին դրական դինամիկայով: Ամբողջ տարվա ընթացքում անշարժ գույքի շուկան գործել է բավականաչափ ակտիվ ոչ միայն գործարքների քանակի, այլև շուկայական արժեքի դրական աճի առումով:
«Ինչ վերաբերում է 2020 թվականին, ապա դեռ հնարավոր չէ ամփոփ, լուրջ վերլուծություն կատարել, դեռ մոտ տասը օր ենք աշխատում: Այդուհանդերձ նախորդ տարվա համեմատ էական փոփոխություններ չեն նկատվել: Առկա է նույն շարժը, դինամիկան և պահանջարկը, որոնք կային նաև նախորդ տարեվերջին»,- ասաց նա:
Ապրիյանի տեղեկացմամբ՝ մեծ է պահանջարկը նորակառույց շենքերի նկատմամբ, որը հատկապես հետաքրքրում է եկամտային հարկի վերադարձից օգտվող պոտենցիալ գնորդներին:
Զգայուն ակնկալիքներն ու անշարժ գույքի շուկան․ ինչ սպասել 2020–ին
«Երկրորդային շուկայում շոշափելի փոփոխություններ առայժմ չեն նկատվել: Պահանջարկի մասով անկում չկա, որովհետև երկրորդային շուկայում գործում են նաև պետական ծրագրեր, որոնք առնչվում են, օրինակ, զինծառայողներին կամ երիտասարդ ընտանիքներին: Պետությունը նրանց աջակցում է սուբսիդավորման միջոցով»,- նշեց մասնագետը:
Ի՞նչ փոփոխության է ենթարկվել անշարժ գույքի շուկան. գների դինամիկա
Նրա փոխանցմամբ՝ արտադրական ֆոնին նույնպես նկատվում է դրական դինամիկա, ինչը պայմանավորված է արտասահմանյան ներհոսքով, ընդ որում՝ այստեղ մեծ հետաքրքրություն են ցուցաբերում նաև սփյուռքահայերը, որոնք գնում են անշարժ գույք, հողակտորներ, որպեսզի կազմակերպեն արտադրություն և շարունակաբար զբաղվեն ձեռնարկատիրությամբ: Մեծ է պահանջարկը նաև պահեստային տարածքների նկատմամբ, ինչը հաճելիորեն զարմացրել է ոլորտի մասնագետներին:
