ԵՐԵՎԱՆ, 23 հունվարի — Sputnik. RadioAurora–ի տեսանյութում լսվում է` ինչպես են բանակցում «Էրեբունի պլազայում» կրակոցներ արձակած անձը և ՀՀ ոստիկանության պետի ժամանակավոր պաշտոնակատար Արման Սարգսյանը։
![Կյանքս վստահում եմ քեզ. ինչպես է ոստիկանապետը բանակցում կրակոցներ արձակածի հետ. տեսանյութ Կյանքս վստահում եմ քեզ. ինչպես է ոստիկանապետը բանակցում կրակոցներ արձակածի հետ. տեսանյութ - Sputnik Արմենիա](https://cdn.am.sputniknews.ru/img/2180/98/21809832_0:0:1280:720_600x0_80_0_0_39bdc75635223d3b4c0ccbf578233c85.jpg)
«Էրեբունի պլազա» բիզնես կենտրոնում հունվարի 23-ին կրակոցներ են հնչել։ Ոստիկանությունը 14։40 ահազանգ է ստացել, որ շենքում զինված անձ կա։ Անմիջապես դեպքի վայր են մեկնել օպերատիվ խմբերը։
«Սխալ բան եմ անում անվտանգության առումով, բայց լսիր` ինչ եմ ասում. հիմա իմ մեքենայով գնում ենք իմ սենյակ, որ զրուցենք։ Սա ասում եմ աչքերիդ մեջ նայելով»,–ասում է Սարգսյանը և հարցնում կրակոցներ արձակողի անուն –ազգանունը։
Տղամարդն ասում է, որ ինքը Արթուր Թորոսյանն է և հասկանում է` ինչ է առաջարկում ոստիկանապետի ԺՊ–ն, սակայն նման քայլի դիմելն իր միակ միջոցն է եղել։
Ի պատասխան Սարգսյանը նորից համոզում է տղամարդուն` ասելով, որ երբ մարդիկ նման քայլի են դիմում, ուզում են իրենց ձայնը լսվի, տեղ հասնի։
«Ձեր ձայնը հասել է ՀՀ ոստիկանության պետին։ Հիմա երկուսով գնանք իմ սենյակ ու զրուցենք։ Ես հիմա կյանքս վստահում եմ քեզ, արխային զենքդ վայր դիր»,–ասում է Սարգսյանը։
«Էրեբունի պլազայում» զինված անձի հետ բանակցում է Սարգսյանը
Դրանից հետո տղամարդը զենքը վայր է դնում ու ոստիկանության պետի ԺՊ–ի հետ նրա ծառայողական մեքենայով լքում են տարածքը։
Sputnik Արմենիան արդեն ներկայացրել է տեսանյութ, որտեղ երևում է` ինչպես է կրակոցներ արձակած տղամարդը նստում Սարգսյանի ծառայողական մեքենան ու հեռանում։
«Էրեբունի պլազայում» այսօր տեղի ունեցած միջադեպի վերաբերյալ րոպեներ առաջ տեսանյութ է հրապարակել նաև ՀՀ ոստիկանությունը։
Նշենք, որ «Էրեբունի պլազա» բիզնես կենտրոնում գործում են մի շարք գրասենյակներ, այդ թվում` «5–րդ ալիք» հեռուստաընկերությունն ու ՀՀ երկրորդ նախագահ Ռոբերտ Քոչարյանի գրասենյակը։
Եթե միջադեպը մեզ վերաբերի, հայտարարությամբ հանդես կգանք. Վիկտոր Սողոմոնյան