ԵՐԵՎԱՆ, 23 հունվարի — Sputnik. ՀՀ վարչապետ Նիկոլ Փաշինյանը կառավարության այսօրվա նիստում հայտնեց, որ միջազգային զեկույցների համաձայն` Հայաստանը ճանաչվել է տարածաշրջանի ամենաժողովրդավարական երկիր։
Նրա խոսքով` «Միջազգային ժողովրդավարության ինդեքս» ամենամյա զեկույցում Հայաստանի ժողովրդավարությունը գնահատվել է 5.54 միավոր` նախկին 4.79-ի փոխարեն, և 17 կետով բարելավել դիրքերը 107 երկրների շարքում` 103–րդ հորիզոնականից զբաղեցնելով 86–րդ տեղը։
Մեկ այլ` Թրանսփարենսի ինթերնեյշնլ միջազգային հակակոուպցիոն կազմակերպության զեկույցով` Հայաստանն ԱՊՀ երկրների շարքում ամենամեծ առաջընթացն է գրանցել կոռուպցիայի դեմ պայքարի ցուցանիշներով։
Վարչապետի խոսքով` ըստ այդ զեկույցի, Հայաստանին 100 առավելագույնից տրվել է 35 միավոր` նախկին 42–ի փոխարեն։ Հայաստանը 28 կետով բարելավել է դիրքերը և 180 երկրների շարքում հայտնվել 77–րդ հորիզոնականում` նախկին 105–ի փոխարեն։
«Զեկույցում նշվել է, որ հեղափոխությունից ու նոր կառավարության ձևավորումից հետո Հայաստանը խոստումնալից հեռանկարներ ունի հակակոռուպցիոն բարեփոխումներ իրականացնելու ոլորտում, և, չնայած նշված զարգացումներին, ոչ թափանցիկ հասարակական երևույթները խանգարում են կոռուպցիայի արմատական վերացմանը»,– ասաց վարչապետը։
Հայաստանում ժողովրդավարությունը կախված չի լինի լիդերի կամ քաղաքական ուժի ճաշակից. վարչապետ
Հակակոռուպցիոն ոլորտը, վարչապետի խոսքով, մեծապես կախված է Հայաստանում իրականացվող դատաիրավական բարեփոխումներից։
«Կենտրոնանանք և 2020թ–ին վերջնականապես ճեղքենք այն շղթան, սահմանը, որը մեզ պահում է միջին երկրների շարքում»,– ասաց Փաշինյանը։
Հիշեցնենք, 2019թ–ի դեկտեմբերին վարչապետը հայտարարել էր` համակարգային կոռուպցիա Հայաստանում չկա։ Բայց դա չի նշանակում, որ ՀՀ-ում կոռուպցիոն երևույթներ չկան:
Հայաստանի տնտեսական վարկանիշն անընդհատ աճում է. Փաշինյան
Փաշինյանը հայտարարել էր, որ կա կոռուպցիայի դեմ պայքարի քաղաքական կամք, և նույնիսկ ամենամերձավոր թիմի անդամները չեն ներվելու կոռուպցիայի մեջ ներգրավվելու պարագայում։
