ԵՐԵՎԱՆ, 22 հունվարի — Sputnik. ՌԴ–ում ՀՀ դեսպանատան «Վերին Լարսում» մաքսային կցորդի պաշտոնում առաջարկվող թեկնածուն ներկայացվել է ՀՀ կառավարությանը և արժանացել դրական եզրակացության։ Այսօր ԱԺ–ում` պատասխանելով պատգամավոր Միքայել Մելքումյանի հարցին, հայտնեց ՀՀ ՊԵԿ նախագահ Դավիթ Անանյանը։
«Որոշման նախագիծն արդեն կա, գտնվում է կառավարությունում և մոտ օրերս արդեն լինելու է քննարկման առարկա։ Անձը կա, բոլոր համաձայնություններն առկա են»,– ասաց Անանյանը` չբացահայտելով ապագա պաշտոնյայի անձը։
Հիշեցնենք` դեկտեմբերի 12-ին, կառավարության նիստում ՊԵԿ նախագահ Դավիթ Անանյանը վարչապետին առաջարկել էր ՌԴ–ում ՀՀ դեսպանատանը կից նոր հաստիք բացել, որը զբաղեցնող անձը «Վերին Լարսի» անցակետում հենց տեղում կօգնի լուծել հայաստանցի փոխադրողների խնդիրները։
Վերին Լարսում կնստի դեսպանատան նոր պաշտոնյան. Հայաստանը որոշել է նոր հաստիք բացել
Նախագծի անհրաժեշտությունը մեկնաբանվում է այն հանգամանքով, որ այժմ Վերին Լարս միջազգային ավտոմոբիլային անցակետում առաջանում են խնդիրներ, որոնք հիմնականում առնչվում են ՌԴ մաքսային մարմինների գործառույթներին։ Ռուսական կողմի հետ քննարկումների արդյունքում ձեռք է բերվել պայմանավորվածություն, որ Վերին Լարսում կլինի ՀՀ դեսպանատանը կից մաքսային կցորդ, որն ամենօրյա ռեժիմով կծանոթանա անցակետում ծագող խնդիրներին ու կառաջարկի օպերատիվ լուծումներ։
Լարսի այլընտրանք լաստանավային ուղին. վրացի փորձագետն ասել է` որ դեպքում այն կգործարկվի
Նոր պաշտոնյան նշանակվելու է ՀՀ կառավարության որոշմամբ` 3 տարի ժամկետով։ Այդ պաշտոնին արժանանալու համար անձը պետք է առնվազն 1 տարի մաքսային համակարգում բարձր պաշտոն զբաղեցրած լինի և տիրապետի առնվազն 2 օտար լեզվի, որոնցից մեկը` ռուսերեն։
Նոր պաշտոնյայի նստավայրը կլինի Օսեթիայի մաքսային ծառայության` Վլադիկավկազում գտնվող գրասենյակը։
