ԵՐԵՎԱՆ, 21 հունվարի – Sputnik. Անասնապահությամբ զբաղվող ֆերմերներն ու գյուղացիներն այսօր առավոտյան փակել էին Արարատ–Երևան մայրուղին` պահանջելով հետաձգել կամ չեղարկել սպանդանոցներում կենդանիների սպանդի պահանջը։
Հունվարի 15-ից հանրապետությունում թույլատրվում է միայն արտոնագրված սպանդանոցներում կենդանիների մորթից ստացված մսի վաճառքը։
Ցուցարարների հետ հանդիպելու էին եկել Արարատի մարզպետ Գարիկ Սարգսյանն ու ՀՀ ԱԺ պատգամավոր Ռուստամ Բաքոյանը։ Բանակցությունների արդյունքում նրանք համոզեցին ակցիայի մասնակիներին բացել ճանապարհը։ Մարզպետը հայտնեց, որ 16:00 ԱԺ–ում կքննարկվի խնդիրը։ Նա նաև ցուցարարներին հրավիրեց մասնակցելու խորհրդակցությանը, որը տեղի կունենա մարզպետարանում։
«Մեդալի երկու կողմ կա։ Մի կողմից ձեր պահանջներն են, մյուս կողմից` հակասանիտարական վիճակը, որը եղել է մինչև հունվարի 15-ը, անթույլատրելի է։ Մենք պատրաստ ենք ձեզ լսել, բայց և դուք էլ պետք է զիջումների գնաք», – ասաց Սարգսյանը։
Ֆերմերները համաձայնեցին բացել ճանապարհը, սակայն սպառնացել են կրկին այն փակել, եթե իրենց պահանջը չկատարվի։
Հիշեցնենք` ս.թ. հունվարի 15-ից ուժի մեջ է մտել կառավարության ընդունած որոշումն այն մասին, որ ՀՀ ողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչը անվտանգության երաշխիք է։
Հունվարի 15-ին որոշման դեմ բողոքող ֆերմերները հայտարարում էին, որ սպանդանոցները մորթի դիմաց չափազանց մեծ գին են պահանջում, բայցի այդ շատ տեղերում դրանք ընդհանրապես բացակայում են, և անասուն մորթելու համար ֆերմերը ստիպված է լինում տասնյակ կիլոմետրեր անցնել։
Ավետիսյան. «Սպանդանոցային ծագում չունեցող մսեղիքը կառգրավվի»
Երեկ` հունվարի 20–ին, մսավաճառները բողոքի ակցիա էին կազմակերպել ՀՀ կառավարության շենքի մոտ։
Իրենց ձայնը կառավարության շենքի ներսում լսելի դարձնելու համար մսավաճառները ակցիայի ընթացքում փորձեցին փակել Հանրապետության հրապարակի երթևեկելի հատվածը։ Բայց ոստիկանությունը հեռացրեց ցուցարարներին փողոցի բանուկ մասից։
Վարչապետի ընդունելությանը չարժանացած անասնապահներն ի վերջո որոշեցին վերադառնալ մարզեր ու այսօր առավոտից փակել մարզային ճանապարհները։
