Տատիկներն ու պապիկներն իրենց թոռներին մեծ սիրով ու քնքշանքով են վերաբերվում, և ի տարբերություն ծնողների, նրանք պատրաստ են անդադար երես տալ փոքրիկներին։ Սակայն ոչ բոլորին է հաջողվում հաճախ տեսնվել թոռների հետ, որովհետև ապրում են տարբեր քաղաքներում, երբեմն էլ` տարբեր երկրներում։ Սա այդպիսի դեպքերից է։
Տեսանյութը հրապարակել է աղջնակի մայրը և պատմել, որ իրենք Նյու Ջերսիից Ֆլորիդա են մեկնել, որպեսզի ծննդյան կապակցությամբ անակնկալ մատուցեն տատիկին։ Կնոջ երջանկությունն անսահման է եղել։ Երբ նա դռան ապակեպատ հատվածից տեսել է երեխային, ուրախությունից սկսել է բղավել. «Oh my God, oh my God»։ Ժամանակ է պահանջվել, մինչև հուզված տատիկը կարողացել է բացել դուռը։
Տեսանյութը բուռն քննարկման թեմա է դարձել համացանցում։ Օգտատերերից մեկը գրել է. «Ահա թե ինչ է կատարվում մարդու հետ, երբ երեխաները և ընդհանրապես մարդիկ դադարում են շփվել ծնողների կամ հարևանների հետ»։ Մյուսն էլ ավելացրել է. «Այնպիսի տպավորություն է, կարծես տատը 10 տարի ոչ մեկի հետ չի շփվել և մենակ է ապրել»։ Մեկը ուրիշն էլ նշել է. «Որքան սարսափելի է, տատն աննորմալի պես է գոռում»։
