ԵՐԵՎԱՆ, 17 հունվարի — Sputnik. «Հոկտեմբերի 27»-ի գործով ցմահ ազատազրկման դատապարտված Նաիրի Հունանյանը նամակ է գրել ՀՀ վարչապետ Նիկոլ Փաշինյանին։ Այս լուրը Sputnik Արմենիայի հետ զրույցում հաստատեցին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից։
Նրանք նաև նշեցին, որ այլ մանրամասներ հրապարակման ենթակա չեն:
Բայց «Հրապարակ» կայքին որոշ մանրամասներ են հայտնի դարձել Հունանյանի գրած նամակից։
Ըստ այդմ` նա ողջունել է 27-ի անջատված մասով նախաքննությունը վերսկսելու որոշումը և գործի քննությանը մասնակցելու պատրաստակամություն հայտնել՝ խոստանալով ջանք չխնայել ու աջակցել կազմակերպիչների բացահայտմանը։
«Նա նշել է, որ ինքն այդ գործով «ասելիք ունի»»,–գրել է կայքը:
Հիշեցնենք, որ «Հոկտեմբերի 27»-ի գործով ահաբեկչական խմբավորման ղեկավար Նաիրի Հունանյանը սեպտեմբերի 11–ին դիմում էր ներկայացրել` վաղաժամկետ ազատ արձակման խնդրանքով, քանի որ դատապարտվելուց 20 տարի անց ցմահ դատապարտյալներն իրավունք ունեն դիմելու պայմանական վաղաժամկետ ազատման համար։
Հայաստանում ցմահ ազատազրկվածների` ներման խնդրագիր ներկայացնելու ժամկետը կկրճատվի
Սեպտեմբերի 19-ին Քրեակատարողական ծառայությունը, իսկ հոկտեմբերի 23-ին Պրոբացիայի ծառայությունը Հունանյանի դիմումի առնչությամբ ներկայացրել էին բացասական զեկույց: Հաշվի առնելով 2 ծառայությունների ներկայացրած զեկույցների բացասական լինելու հանգամանքը՝ քրեակատարողական հիմնարկի վարչակազմը հոկտեմբերի 28-ին որոշել էր Հունանյանի՝ պայմանական վաղաժամկետ ազատվելու հարցը դատարան չներկայացնել։
