ԵՐԵՎԱՆ, 17 հունվարի - Sputnik. Կոտայքի մարզի Գետամեջ գյուղում գտնվող մասնավոր ձկնաբուծարանում երեկ երեկոյան արձանագրված ձկների զանգվածային անկման դեպքով հարուցվել է քրեական գործ։ Այս տեղեկությունը Sputnik Արմենիային հայտնեց Գետամեջի գյուղապետ Ավետիս Մուրադյանը։
Բնապահպանական աղետ Արցախում. ո՞վ է մեղավոր ձկների զանգվածային սպանդի համար
«Քրեական գործը կբացահայտի երևի, թե ինչ է եղել և ինչու է եղել»,– ասաց գյուղապետը` հավելելով, որ ինքն այդ միջադեպի վերաբերյալ որևէ վարկած կամ ենթադրություն չունի։
Մուրադյանի խոսքով` ձկնաբուծարանն իրականում փոքր տարածք է, փոքր բիզնես։
«Մարդն իր այգում մի փոքր ավազան է սարքել, 4000 հատ իշխանի մանրաձուկ էր պահում։ Գետը (գետ էլ չէ, մի փոքր գետակ է, 1-1.5 մետր լայնությամբ) իր տան մոտով է անցնում։ Գետակի վրա ավազան է կառուցել, ջուրը գետակից մտնում է ավազան ու նույն չափով էլ դուրս է գալիս։ Այդ ավազանում ձուկ է պահել»,– ասաց գյուղապետը։
Անհատ ձեռնարկատեր Կարեն Գրիգորյանը հայտնեց, որ ավազանում զանգվածային անկման պահին 200-250 գրամանոց շուրջ 4700-5000 հատ մանրաձուկ է եղել։ Կատարվածի հետևանքով գյուղաբնակ գործարարը զրկվել է իր ամբողջ բիզնեսից։
«Ոչ մի խնդիր չի եղել։ Առավոտյան, ժամը 10-ի սահմաններում, կերը տվել եմ, ամեն ինչ նորմալ է եղել։ Ժամը 15։30-16։00-ի կողմերը եկել ենք, որ նորից կերակրենք, տեսել ենք` բոլոր ձկները սատկել են։ Նման բան չէր եղել։ Անգամ գետի միջի ձկներն էին սատկել»,–ասաց ձկնաբուծարանի սեփականատերը։
Միակ կասկածելի բանը, որ նկատել, բայց այդ պահին Կարեն Գրիգորյանը ուշադրության չի արժանացրել, ձկների անկմանը նախորդած րոպեներին գետակի անսովոր վարար հոսքն է եղել։
«Մի քիչ վարարել էր։ Թե որտեղից էին բաց թողել, ինչ հիմնարկ էր բաց թողել ու ինչ արտահոսք է եղել, ես չեմ կարող ասել։ Վարարել է նույն օրը, ժամը 15։30-16։00–ի կողմերը ու տևել է մոտ 2 ժամ»,– ասաց Կարեն Գրիգորյանը։
Հիշեցնենք` երեկ երեկոյան shamshyan.com կայքը հայտնել էր, որ Կոտայքի մարզի Գետամեջ գյուղի ձկնաբուծարանում իշխանների զանգվածային անկում է գրանցվել։ Գյուղի բնակիչները կայքին ասել էին, որ նկատել են` ինչպես է ավազանից նեխած, փրփրոտ սև ջուր լցվում գետը։
